شىعىس قازاقستاننان اتتانعان جۋرناليستەر دەلەگاسياسى تاتارستان رەسپۋبليكاسىنىڭ ينۆەستيسيالىق دامۋ اگەنتتىگىنىڭ جۇمىس بارىسىمەن تانىسىپ قايتتى. وندا كورشىلەس مەملەكەتتىڭ ەكونوميكالىق جانە وندىرىستىك سالاسىنان سىر شەرتەتىن تالاي اقپاراتتى جيناپ قايتتى. سونداي-اق ينۆەستيسيالىق سيفرلاندىرۋ سالاسى بويىنشا دا مالىمەتتەر الدى.
ايتا كەتەيىك، مۇنداي ورتالىق شىعىس قازاقستان دا بار. بۇل شقو اكىمدىگىنىڭ قولداۋىمەن قۇرىلعان. ال وسى ورتالىقتى قۇرۋ بارىسىندا تاتارستان رەسپۋبليكاسىنىڭ تاجىريبەسى قولدانىلعان.
تاتارستان رەسپۋبليكاسىنىڭ ينۆەستيسيالىق دامۋ اگەنتتىگىنىڭ جەتەكشىسى تاليا مينۋللينا ايتۋىنشا، بۇل مەملەكەتتەگى بيلىك وكىلدەرى اقپاراتتىق دامۋعا الدەقاشان دەن قويىپ، IT-تەحنولوگيا سالاسىن وركەندەتۋگە كولەمدى ينۆەستيسيا سالۋدا.
وسى ورايدا شىعىس قازاقستان دا اقپاراتتىق تەحنولوگيانى دامىتۋعا باسا نازار اۋدارىلىپ وتىرعانىن ايتا كەتكەن ورىندى. بۇدان بولەك شقو مەن تاتارستانداعى سيفرلاندىرۋ سالاسىندا ۇقساستىقتار كوپ: دەنساۋلىق ساقتاۋ مەن ءبىلىم بەرۋ سالاسى ەلەكتروندى فورماتقا كوشكەن، مەملەكەتتىك قىزمەتتەردى ونلاين رەجيمدە الۋعا بولادى، قالالاردىڭ قاۋىپسىزدىگىن قامتاماسىز ەتۋ ماقساتىندا گلوناسس جۇيەسى ەنگىزىلدى.
سونداي-اق شىعىس قازاقستان وبلىسىنىڭ اكىمى دانيال احمەتوۆ IT-مامانداردى دايارلاۋعا ءمان بەرىپ وتىر. سونداي-اق ايماق باسشىسى IT-ينجەنەرلەر بولاشاقتا جوعارى سۇرانىسقا يە ەكەنىن ۇنەمى ايتىپ كەلەدى. بۇدان بولەك وبلىس مەكتەپتەرىندە IT-سىنىپتار اشىلعان. وندا روبوتتى تەحنيكا ءپانى وقىتىلادى. سونىمەن قاتار IT-مامانداردى دايارلاۋعا گرانتتار بولىنەدى. سونداي-اق WorldSkills، IT-فەستيۆال، IT-حاكاتون بايقاۋلارى ۇيىمداستىرىلادى. شقو-نىڭ ستۋدەنتتەرى تاتارستانداعى «يننوپوليس» حالىقارالىق ۋنيۆەرسيتەتىندە IT-ماماندىعى بويىنشا ءبىلىم الۋعا مۇمكىندىك الدى. بۇگىندە «يننوپوليس» ۋنيۆەرسيتەتىندە 623 ستۋدەنت وقيدى. وندا كيبەرقاۋىپسىزدىك، جاساندى ينتەللەكت، روبوتتى تەحنيكا، باعدارلامالاۋ سىندى IT-باعىتتارى بويىنشا ءبىلىم الادى. ستۋدەنتتەر حالىقارالىق ستاندارتتارعا سايكەس اعىلشىن تىلىندە وقيدى. ويتكەنى مۇنداعى وقىتۋشىلاردىڭ 80 پايىزى شەتەلدىكتەر. تاليا مينۋللينانىڭ ايتۋىنشا، بۇل ۋنيۆەرسيتەتكە وقۋعا ءتۇسۋ ءۇشىن الەمنىڭ 60 مەملەكەتىنىڭ ستۋدەنتتەرى ءوتىنىم بەرەدى.
«شەتەلدىك ازاماتتار ءبىزدىڭ ۋنيۆەرسيتەتكە بايقاۋ ارقىلى قابىلدانادى. ءسويتىپ وزىق بىلىمدەرىمەن كوزگە تۇسكەندەرى گرانت يەگەرلەرى اتانادى. مۇندا وقۋعا تاپسىرۋ ءۇشىن ءوتىنىش جازىپ، قاجەتتى قۇجاتتاردى جيناپ، تەستتەن ءوتۋ كەرەك. جاس ەرەشەلىگىنە بايلانىستى شەكتەۋ جوق» – دەلىنگەن ۋنيۆەرسيتەتتىڭ سايتىندا.
پىكىر قالدىرۋ