قىتايدىڭ ەكى ازاماتى قازاقستانعا زاڭسىز ءوتتى. ۇقك شەكارا قىزمەتىنىڭ ديرەكتورى دارحان ءدىلمانوۆ بۇعان جول بەرگەندەر جاۋاپقا تارتىلاتىنىن ءمالىم ەتتى، – دەپ Qamshy.kz اقپارات اگەنتتىگى حابارلايدى.

"مەملەكەتتىك شەكارا سەنىمدى قورعالادى، جابىق. الايدا ادام فاكتورى بار. بۇل ماسەلەنى تالداپ جاتىرمىز. جان-جاقتى زەرتتەپ، مەملەكەتتىك شەكارانى قورعاۋدىڭ كەيبىر تۇسىن وزگەرتەمىز"،  –دەپ دارحان ءدىلمانوۆ ءماجىلىس كۋلۋارىندا جاۋاپ بەردى.

ونىڭ ايتۋىنشا، بۇل فاكتى بويىنشا شەكارا قىزمەتىندە تەرگەۋ جۇرگىزىلگەن. كىنالىلەر انىقتالدى.

"تارتىپتىك جازا قولدانىلاتىنى انىق. ارينە، ساربازدار ەمەس، لاۋازىمدى تۇلعالارعا جاۋاپقا تارتىلادى. ءبولىم كومانديرى قىزمەتىنەن بوساتىلدى"، – دەدى شەكارا قىزمەتىنىڭ باسشىسى.

جۇڭگو ازاماتتارىنا قاتىستى ءىس قىلمىستىق كودەكستىڭ 392- بابى ("مەملەكەت شەكاراسىن قاساقانا كەسىپ ءوتۋ") بويىنشا قاراستىرىلادى. زاڭعا سايكەس، كىنالىلەر ءبىر مىڭ ايلىق ەسەپتىك كورسەتكىش (2 ميلليون تەڭگەگە جۋىق) ايىپپۇل تولەيدى نەمەسە ءبىر جىلعا دەيىن باس بوستاندىعىنان ايىرىلىپ، ەلدەن قۋىلادى. سونداي-اق 5 جىل بويى قازاقستانعا كىرە المايدى.

"ولار ءقازىر تەرگەۋ يزولياتورىنا قامالدى. قازاقستان زاڭناماسىنا سايكەس، ەكى اي تەرگەۋ جۇرگىزىلەدى. بۇدان سوڭ مەملەكەتتىك شەكارانى زاڭسىز كەسىپ وتۋگە قاتىستى سوت وتىرىسى وتەدى. ولارعا وزگە ايىپ تاعىلىپ وتىرعان جوق"، – دەدى ءدىلمانوۆ.