قازاقستان پرەزيدەنتى قاسىم-جومارت توقايەۆ ەلوردانىڭ باسىم بولىگىندە جارىقتىڭ ءسونىپ قالۋىنا اكەپ سوقتىرعان اپاتتى جاعدايعا بايلانىستى ۇكىمەتكە ارنايى كوميسسيا قۇرۋدى تاپسىردى دەپ جازادى Qamshy.kz اقپارات اگەنتتىگى. بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي فەيسبۋك جەلىسى ارقىلى حابارلادى.
"مەملەكەت باسشىسى قاسىم-جومارت توقايەۆ ەلوردانىڭ باسىم بولىگىندە جارىقتىڭ ءسونىپ قالۋىنا اكەپ سوقتىرعان اپاتتى جاعدايعا بايلانىستى ۇكىمەتكە ارنايى كوميسسيا قۇرۋدى تاپسىردى. وعان ۆيسە-پرەمەر رومان سكليار ءتوراعالىق ەتەدى. كوميسسيا مۇقيات زەرتتەۋ جۇرگىزىپ، كىنالىلەردى انىقتاپ، قاجەت بولعان جاعدايدا ءىستى قۇقىق قورعاۋ ورگاندارىنا وتكىزەدى. پرەزيدەنت ۇكىمەت پەن نۇر-سۇلتان قالاسىنىڭ اكىمدىگىنەن الداعى ۋاقىتتا مۇنداي جاعدايلارعا جول بەرمەۋ ءۇشىن شۇعىل شارالار قابىلداۋدى تالاپ ەتتى"، - دەپ جازدى بەرىك ءۋالي.
پىكىر قالدىرۋ