مەگاپوليستى ۇزاق مەرزىمدى دامىتۋ بويىنشا ازىرلەنگەن قۇجات ساراپشىلار مەن جۇرتشىلىقتىڭ كەڭىنەن تالقىلاۋىنا ۇسىنىلدى. جوبا نۇسقاسى بويىنشا الماتىنىڭ ىسكەرلىك كەڭەسىنىڭ مۇشەلەرى جۇمىس ىستەدى، دەپ جازادى اكىمدىكتىڭ رەسمي سايتى.
الماتىنى دامىتۋدىڭ باستى ستراتەگيالىق قۇجاتى قالا اكىمى باقىتجان ساعىنتايەۆتىڭ تاپسىرماسى بويىنشا تالقىلانۋدا. الماتى اكىمى مەگاپوليستىڭ تىنىس-تىرشىلىگىنە قاتىستى ازىرلەگەن بارلىق ماڭىزدى قۇجاتتاردى جۇرتشىلىقتىڭ بارلىق وكىلدەرى، ۇەۇ، ىسكەر جاندار، قالانىڭ بەلسەندى ازاماتتارى جان-جاقتى تالقىلاۋلارى ءتيىس ەكەنىن اتاپ ءوتتى.
بۇگىن قالا اكىمدەرىنىڭ ورىنباسارلارى، باسقارما باسشىلارى، قالانىڭ «اتامەكەن» ۇكپ-نىڭ جانە «الماتى» اكك-نىڭ وكىلدەرى الماتىنىڭ ىسكەرلىك كەڭەسىنىڭ مۇشەلەرىمەن كەزدەسۋ وتكىزدى. كەڭەس قۇرامىنا جاھاندىق باعدارلامالار، تيىمدىلىكتى باسقارۋ، «اقىلدى قالانى» دامىتۋ جانە يننوۆاسيالىق دامۋ، ۋربانيستيكا جانە كولىك، كرەاتيۆتى يندۋستريا، قوعامدىق باستامالار كوميتەتتەرى ەنەدى.
«حالىق بانكى» اق باسقارماسىنىڭ ءتورايىمى ءۇمىت شاياحمەتوۆا، «AB Restaurants» ج ش س باسقارۋشى ديرەكتورى اسقار بايتاسوۆ، «Magnum Cash&Carry» ج ش س باسقارماسىنىڭ ءتوراعاسى ازامات وسمانوۆ، «سك سەنتراس ينشۋرانس» اق ديرەكتورلار كەڭەسىنىڭ ءتوراعاسى ەلدار ءابدىرازاقوۆ، IDC ۆيسە-پرەزيدەنتى اندرەي بەكلەميشيەۆ، «Tan media Group» ديرەكتورلار كەڭەسىنىڭ ءتوراعاسى ارمانجان بايتاسوۆ، «قازاقستان كاسىپكەرلەرىنىڭ فورۋمى» ءزتب-نىڭ اتقارۋشى ديرەكتورى مۋناۆارا پالتاشيەۆا، «راكۋرس» ج ش س سەرىكتەسى دوسىم قىدىربايەۆ، Ernst&Young باسقارۋشى سەرىكتەسى ەرلان دوسىمبەكوۆ، «Oi-QaragaiLesnayaSkazka» ج ش س باس ديرەكتورىنىڭ ورىنباسارى دانا بالفانبايەۆا ءوز ۇسىنىستارىن ايتتى.
بيزنەس-قوعامداستىق وكىلدەرى قالا اكىمى ب. ساعىنتايەۆتىڭ الماتىنى ۇزاق مەرزىمدى دامىتۋ جونىندە ايتقان نەگىزگى جەتى باستاماسىن جۇزەگە اسىرۋ شارالارىن تالقىلادى.
ىسكەرلىك كەڭەستىڭ كوميتەتتەرى ۇسىنىستار مەن تالقىلاۋلاردى جيناقتايتىن، سونىمەن قاتار بيزنەس-قوعامداستىقتىڭ، ازاماتتىق سەكتوردىڭ، ۇكىمەتتىك ەمەس ۇيىم مەن اكىمدىكتىڭ قالانى دامىتۋعا باعىتتالعان ۇسىنىستارىن وڭدەۋ مەن جۇزەگە اسىرۋدىڭ پارمەندى ديالوگ الاڭىنا اينالۋلارى ءتيىس.
ەسكە سالساق، بۇرىندارى «الماتى – 2050» ستراتەگياسىنىڭ جوباسى قالانىڭ ساراپشىلار قوعامداستىعىمەن جانە قوعامدىق كەڭەس مۇشەلەرىمەن تالقىلانعان ەدى. قالا اكىمى ب. ساعىنتايەۆتىڭ تاپسىرماسى بويىنشا ستراتەگيا جوباسى تاياۋ ارادا حالىقتىڭ كەڭىنەن تالقىلاۋىنا ۇسىنىلاتىن بولادى. ساراپشىلار مەن الماتىلىقتاردان تۇسكەن ۇسىنىستار جۇمىسشى توپتارىنىڭ وتىرىستارىندا تالقىلانادى. بۇدان وزگە، قۇجات جوباسى قولدانىستاعى بارلىق ديالوگتىك الاڭداردا تالقىلاۋعا ۇسىنىلادى.
پىكىر قالدىرۋ