14 قاراشادا تۇستەن كەيىن اقمولا وبلىسى سەلينوگراد اۋدانىنىڭ پوليسيا بولىمشەسى "قاماۋ يزولياتورىنان قاشىپ كەتتى" دەلىنگەن بەلسەندى دۋلات ءاعادىل جايلى ۆيدەونى جاقتاستارىنا كورسەتتى. بۇل تۋرالى ازاتتىق راديوسى جازدى. 

ازاتتىق راديوسىنىڭ جازۋىنشا، سەلينوگراد اۋدانىنىڭ پوليسيا بولىمشەسى كورسەتكەن ۆيدەو ءاعادىل وتىرعان كامەرا ەسىگىنىڭ ماڭدايشاسىنان تۇسىرىلگەنگە ۇقسايدى. 13 قاراشا تاڭەرتەڭگى ساعات 4-5 شاماسىندا جازىلعان ۆيدەودان ءاعادىلدىڭ بولمەدە جىبىرلاپ جۇرگەنى، قۇجاتتارىن رەتتەگەنى، سىرتقى كيىمىن كيگەنى كورىنەدى. دالىزدەن تۇسىرىلگەن تاعى ءبىر ۆيدەودا ءاعادىلدىڭ ەرسىلى-قارسىلى جۇرگەنى كورىنگەنمەن ونىڭ "قاشىپ كەتكەن ءساتى" كورىنبەگەن.

سەلينوگراد اۋدانىنىڭ پوليسيا ءبولىمىنىڭ باستىعى ەرلان اكپاروۆ ازاتتىق راديوسىنىڭ تىلشىسىنە "عيماراتتىڭ سىرتىندا باقىلاۋ كامەرالارى جوق، سول سەبەپتى ءاعادىلدىڭ ول جاقتان شىعىپ كەتكەنى تۋرالى ۆيدەو-جازبا جوق" دەپ ايتقان. ونىڭ تۇسىندىرۋىنشە، 2013 جىلى تۇرعىزىلىپ، توزىعى جەتكەن دۋالدىڭ استىندا ساڭىلاۋ بار، ءاعادىل سول ساڭىلاۋدان شىعىپ كەتكەن. وقيعانىڭ بارىسىن تۇسىندىرگەن اكپاروۆ ءاعادىلدىڭ ۋاقىتشا قاماۋ ورنىنان قاشىپ كەتپەگەنىن – "ءوز ەركىمەن كەتىپ قالعانىن" ايتقان.

– وعان ەشقانداي جازا قاراستىرىلمايدى. سەبەبى ول اكىمشىلىك باپپەن قامالىپ وتىر. ءبىز مۇنداي جاعدايدا سيرەنانى دا قولدانبادىق، سەبەبى بۇل قىلمىستىق ءىس ەمەس. تابىلعاننان كەيىن دە ەشقانداي جاۋاپقا تارتىلمايدى. تەك قالعان بەس كۇن مەرزىمىن وتەيدى، – دەيدى ەرلان اكپاروۆ.

ءاعادىل تۋرالى اقپارات تالاپ ەتكەن ونىڭ جاقتاستارى مەن ازاتتىق راديوسىنىڭ تىلشىسىنە "ءاعادىلدىڭ دەنى ساۋ، جاعدايى جاقسى ەكەنىنە، كەلەتىنىنە سەنىمدىمىن" دەگەن اكپاروۆ ونىڭ تابىلعانى-تابىلماعانى جايلى ناقتى اقپارات ايتپاعان.

ءاعادىلدى قولداۋشى بەلسەندىلەر پوليسيانىڭ سوزىنە، كورسەتكەن ۆيدەوسىنا كۇمانمەن قارايدى. بەلسەندى ەربول ەسحوجين Facebook ارقىلى تىكەلەي ەفيرگە شىعىپ "ەگەر دۋلات ءاعادىل جايلى جاقسى حابار ەستىمەيتىن بولساق، وندا اقورداعا بارىپ، قارسىلىق اكسياسىن جالعاستىرامىز" دەدى. 

13 قاراشادا كەشكە قاراي اقمولا وبلىسى سەلينوگراد اۋدانى تالاپكەر اۋىلىنىڭ تۇرعىنى 42 جاستاعى بەلسەندى دۋلات ءاعادىلدىڭ وسى اۋدانداعى تەرگەۋ يزولياتوردان "قاشىپ كەتكەنى" تۋرالى اقپارات الەۋمەتتىك جەلىلەردە شىققان. 

14 قاراشا تۇسكە قاراي ىشكى ىستەر مينيسترلىگى ۆەدومستۆو عيماراتىنا بارعان بەلسەندىنىڭ جاقتاستارىنا اعادىلگە قاتىستى تۇسىنىكتەمە بەردى.

14 قاراشادا كەشكە الەۋمەتتىك جەلىدە ءاعادىلدىڭ تابىلعانى، دەنى ساۋ ەكەنى تۋرالى قۇقىق قورعاۋشى باقىتجان تورەعوجينا جازدى. ءبىراق ول تولىق اقپارات الداعى ۋاقىتتا جاريالاناتىنىن جەتكىزدى. كوپ ۇزاماي تورەعوجينا جازباسىن ءوشىردى.