اقتوبەدە ءۇش ەمدەۋ مەكەمەسى قابىلداماي قويعان 5 جاسار قىزدىڭ ولىمىنە بايلانىستى ارنايى كوميسسيا قۇرىلدى، – دەپ Qamshy.kz اقپارات اگەنتتىگى حابارلايدى.

اقتوبە وبلىستىق دەنساۋلىق ساقتاۋ باسقارماسى تاۋەلسىز كوميسسيا قۇرىپ، بالانىڭ ءولىم سەبەبىن انىقتاۋعا كىرىستى.

"بۇل جاعداي دەنساۋلىق ساقتاۋ مينيسترلىگىنىڭ، وبلىس اكىمىنىڭ باقىلاۋىنا الىندى. كوميسسيا قۇرامىندا وزگە وبلىستىڭ دارىگەرلەرى مەن بىلىكتى ماماندارى بار. تاۋەلسىز باقىلاۋ جۇرگىزىلەدى. بالانىڭ ءۇش ەمدەۋ مەكەمەسىنىڭ قابىلداۋ بولىمدەرىندە ءجۇرىپ قالعانىن راستايمىز. بۇل – دۇرىس ەمەس جانە الداعى ۋاقىتتا قاتاڭ شارا قولدانىلادى. بالانىڭ ناقتى قاي جەرى اۋىرعانىن ەندى تاۋەلسىز كوميسسيا انىقتاپ، حابارلايدى. الدىن الا بولجام بويىنشا، ۆيرۋستى ينفەكسيا ميدى جانە تىنىس الۋ جولدارىن جانسىزداندىرعان"، – دەپ  وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى سۆەتلانا ەسەنامانوۆا مالىمدەمە جاسادى.

ونىڭ ايتۋىنشا، بالا 6 كۇن بويى اۋىرىپ، جەتىنشى كۇنى جەدەل جاردەم شاقىرعان.

"بالاباقشادا جۇرگەندە قىزۋى كوتەرىلىپ، ارادا اپتا وتكەندە عانا دارىگەرلەرگە جۇگىنگەن. بۇل – مەنينگيت ەمەس، جەدەل رەسپيراتورلىق-ۆيرۋستىق ينفەكسيا"، – دەيدى س.ەسەنامانوۆا.

الدىمەن  ناۋقاس قىز جەدەل جاردەممەن وبلىستىق بالالار اۋرۋحاناسىنا جەتكىزىلگەن. ول جەردەن جۇقپالى اۋرۋلار اۋرۋحاناسىنا، ودان ءارى قالالىق بالالار اۋرۋحاناسىنا جولدانعان.

"ەمحانادان جەدەل جاردەممەن وبلىستىق بالالار اۋرۋحاناسىنا جەتكىزىلدى. پەدياتر، نەيروحيرۋرگ قاراپ، جۇقپالى اۋرۋلار اۋرۋحاناسىنا جىبەرگەن. ول ەمدەۋ ورنى ناۋقاستى قابىلداماي، قوسىمشا كەڭەس الۋ ءۇشىن قالالىق بالالار اۋرۋحاناسىنا سىلتەدى. بۇل – دۇرىس ەمەس. جۇقپالى اۋرۋلار اۋرۋحاناسى قاجەتتى ماماندى ەمدەۋ ورنىنا شاقىرۋى ءتيىس ەدى. سودان سوڭ بالا قالالىق بالالار اۋرۋحاناسىنا بارىپ، جۇقپالى اۋرۋلار اۋرۋحاناسىنا قايتا كەلىپ، اۋرۋحانادا كوز جۇمدى. انىقتالعانى وسى"، – دەدى باسقارما باسشىسىنىڭ ورىنباسارى.