شىعىس قازاقستاننىڭ وبلىس ورتالىعىندا، جامبىل ساياباعىندا ۇلى اقىن جامبىل جابايەۆتىڭ ەسكەرتكىشى سالتاناتتى تۇردە اشىلدى. جوبا وبلىس اكىمى دانيال احمەتوۆتىڭ باستاماسىمەن جۇزەگە اسىرىلدى. ەسكەرتكىشتىڭ اۆتورلارى اتاقتى مۇسىنشىلەر سارسەن سەيتوۆ پەن قازىبەك دۋلاتوۆ.

 

ەسكەرتكىشتىڭ ۇزىندىعى ەكى جارىم مەترگە جۋىق. تاستىڭ ۇستىندە دومبىرادا ويناپ وتىرعان جامبىل جابايەۆتىڭ قولادان جاسالعان بەينەسى بىرنەشە باسپالداقتان تۇراتىن دوڭگەلەك الاڭى بار تۇعىرعا ورناتىلعان.

 

ەسكەرتكىشتىڭ اشىلۋ سالتاناتىنا جامبىل جابايەۆتىڭ تۋىستارى، ءوڭىردىڭ زيالى قاۋىمى مەن قالا جۇرتشىلىعى، ايماق باسشىسى دانيال احمەتوۆ قاتىستى.

 

– اقىننىڭ شىعارماشىلىعى جازباشا جانە اۋىزشا كۇيىندە قازاق حالقىنىڭ اراسىندا كەڭىنەن تاراتىلدى. ونىڭ تۋىندىلارىنان وتانعا دەگەن ماحابباتى بايقاۋعا بولادى. ول حالىقتىڭ مۇڭى مەن ەركىندىگىن، تاريحي تۇلعالار مەن باتىرلاردىڭ ەرلىگىن جىرعا قوسىپ، قوعامداعى كەلەڭسىز جاعدايلاردى سىنعا الىپ، شىنشىلدىق تۋرالى ولەڭ شىعاردى. اقىننىڭ تۋىندىلارى اۋىزشا تۇردە حالىق اراسىندا تارالىپ، كەيىننەن بىرنەشە تىلگە اۋدارىلدى. بۇگىندە ونىڭ شىعارماشىلىعىن رەسەي، جۇڭگو، ۇلىبريتانيا، چەحيا مەن سلوۆاكيا ەلدەرىندە جارىق كورگەن كىتاپتاردان دا وقۋعا بولادى. بۇل ساياباققا جامبىل جابايەۆتىڭ ەسىمى بەرىلدى. سوندىقتان وسى الاڭ شىعارماشىلىق كەزدەسۋلەر مەن بايقاۋلاردىڭ، تانىمال مادەنيەت جانە ونەر قايراتكەرلەرىنىڭ باس قوساتىن مەكەنىنە اينالسىن، – دەدى دانيال احمەتوۆ.

 

ايتا كەتەيىك، قازاقستانداعى عيماراتتارعا، كوشەلەر مەن ساياباقتارعا اقىننىڭ ءاتى-جونى بەرىلگەن. سونداي-اق ەسكەرتكىشتەر اشىلعان. شىعىس قازاقستاندا جامبىل جابايەۆ اتىنادعى 5 مەكتەپ، 3 ەلدى مەكەن، 33 كوشە بار.