ءال-فارابي اتىنداعى قازۇۋ عىلىمداعى كوشباسشىلىق ورنىن انىقتاپ، «عىلىم كوشباسشىسى – Web of Science Awards-2019» بەدەلدى جۇلدەسىنىڭ ءتورت نوميناسياسى بويىنشا جەڭىمپاز اتاندى. حالىقارالىق بەدەلدى جانە تانىمال «Clarivate Analytics» قازاقستاندىق عالىمدار مەن ۇيىمداردى ماراپاتتاۋ ءراسىمىن الماتىدا وتكىزدى.
جىل سايىن ۇزدىك عالىمدار، زەرتتەۋ ۇيىمدارى مەن عىلىمي جۋرنالدار «Web of Science Award» حالىقارالىق جۇلدەلەردىڭ يەگەرلەرى اتانادى. «Web of Science Core Collection» الەمدەگى 34 مىڭنان استام جۋرنالداردى قامتيتىن عىلىمي جۇمىستار كوشىرىلگەن جەتەكشى دەرەكتەر بازاسى. قازىرگى ۋاقىتتا بۇل پلاتفورمادا قازاقستاندىق عالىمداردىڭ 25 مىڭعا جۋىق عىلىمي جاريالانىمى يندەكستەلەدى.
ءال-فارابي اتىنداعى قازۇۋ «عىلىم كوشباسشىسى – Web of Science Awards-2019» بەدەلدى جۇلدەسىنىڭ ءتورت نوميناسياسى بويىنشا جەڭىمپاز اتانىپ، ءوزىنىڭ عىلىمداعى جەتەكشى ورنىن تاعى دا دالەلدەدى. ول Q1 جانە Q2 كۆارتيلدەرى جۋرنالدارىنداعى جاريالانىمداردىڭ سانى بويىنشا سوڭعى 5 جىلدىڭ ىشىندە قازاقستاننىڭ جوو اراسىندا كوشباسشى بولدى. ۇيىمداستىرۋشىلاردىڭ ايتۋىنشا، جوعارى رەيتينگتى شەتەلدىك باسىلىمدارداعى ءاربىر بەسىنشى جاريالانىم قازاقستاندىق اۆتورلاردىكى. بۇل – قازۇۋ عالىمدارىنىڭ قوسقان ۇلەسى. تاۋەلسىز سىيلىقتى «Web of Science Core Collection» كىرگەن عىلىمي مونوگرافيالار اۆتورى رەتىندە قازۇۋ رەكتورى، اكادەميك عالىم مۇتانوۆ يەلەندى. كورنەكتى قازاقستاندىق عالىمنىڭ «ەكونوميكالىق جوسپارلاۋ، باسقارۋ جانە بيۋدجەتتەۋدەگى ماتەماتيكالىق ادىستەر جانە مودەلدەر» عىلىمي ەڭبەگى ەڭ كوپ سۇرانىسقا يە بولعانداردىڭ ءبىرى جانە تابىستى جالعاسىن تابۋدا.
ايتا كەتۋ كەرەك، بۇل مونوگرافيا ەكونوميكا سالاسىنداى نوبەل سىيلىعىنىڭ لاۋرەاتى دجون نەش تاراپىنان جوعارى باعاعا يە بولدى جانە الەمدەگى ەڭ ءىرى «Springer Nature» باسپاسىنان جارىق كوردى. ول جوعارى سۇرانىسقا يە بولعان كىتاپتاردىڭ جيىنتىعىنا كىردى، ەلەكتروندى تۇردە ونى 15 مىڭعا جۋىق پايدالانۋشى جۇكتەگەن. بۇل – ۇزدىك كورسەتكىشتەردىڭ ءبىرى. جۋىردا عانا جەنمين ۋنيۆەرسيتەتى جانىنداعى قحر جەتەكشى باسپاسى مونوگرافيانى جۇڭگو تىلىنە اۋدارىپ، ونىڭ تۇساۋكەسەرىن الەمدەگى ەڭ ءىرى بەيجىڭ حالىقارالىق كىتاپ كورمەسىندە جاسادى.
قازۇۋ-دىڭ «International Journal of Biology and Chemistry» عىلىمي جۋرنالى وتاندىق مامانداندىرىلعان عىلىمي باسىلىمدار اراسىنان ۇزدىك شىقتى. «ۇزدىك جاس عالىم» نوميناسياسى بويىنشا PhD دوكتورى، قازۇۋ پوستدوكتورانتى ج.ا.مولدابەكوۆ تانىلدى. ونىڭ، «Web of Science Core Collection» دەرەكتەر بازاسىنا كىرەتىن، جوعارى رەيتينگتى باسىلىمداردا 42 عىلىمي ماقالا بار.
«سوڭعى جىلدارى قازۇۋ وتە تابىستى جۇمىس ىستەپ جاتىر. عىلىمي جاريالانىمدار جاعىنان ۇلكەن پروگرەسس بار ەكەنىن ايتقىم كەلەدى. بۇل ۋنيۆەرسيتەت باسشىلىعىنىڭ ەسەلى ەڭبەگى. ارينە، قازۇۋ-دىڭ وراسان عىلىمي الەۋەتى بار، عالىمداردى قولداۋ جانە بىرلەسكەن زەرتتەۋ جوبالارىن ىسكە اسىرۋ بويىنشا بىرلەسكەن جۇمىستاردى دامىتۋ ءبىزدىڭ الداعى جوسپارىمىزدىڭ ءبىرى بولماق، – دەدى «Clarivate Analytics» كومپانياسىنىڭ رەسەي مەن تمد ەلدەرىندەگى باسقارۋشى ديرەكتورى ولەگ ۋتكين.
شاراعا «Clarivate Analytics» كومپانياسىنىڭ، ق ر ۇلتتىق عىلىم اكادەمياسىنىڭ باسشىلىعى، ق ر بعم مەن جوعارى وقۋ ورىندارىنىڭ، ءعىلىمي-بىلىم بەرۋ جانە ىسكەرلىك توپتارىنىڭ وكىلدەرى، سونداي-اق بەدەلدى وتاندىق جانە شەتەلدىك ساراپشىلار قاتىستى.
پىكىر قالدىرۋ