سىبايلاس جەمقورلىققا قارسى ءىس-قيمىل اگەنتتىگى پارانىڭ قاي بانكتەر ارقىلى بەرىلەتىنىن جاريالادى، – دەپ Qamshy.kz اقپارات اگەنتتىگى حابارلايدى. 

تەرگەۋشى دانيار بيگايداروۆتىڭ مالىمدەۋىنشە، بۇگىندە ءارتۇرلى ەلەكتروندى جۇيەلەر ارقىلى پارا بەرۋ ارەكەتتەرى جىل سايىن كوبەيىپ كەلەدى.

"بيىل Kaspi بانكتىڭ تولەم جۇيەلەرى ارقىلى پارا بەرۋ فاكتىلەرى انىقتالعان. سونىڭ ىشىندە Kaspi Gold، Kaspi ءاميان جانە تاعى باسقا قىزمەتتەر بار. مىسالى، تۇركىستان وبلىستىق مادەنيەت باسقارماسىنىڭ  باسشىسى ءبولىم باسشىسى ارقىلى تاريحي-ولكەتانۋ مۋزەيىنىڭ قىزمەتكەرىن جۇمىسقا العانى ءۇشىن 700 مىڭ تەڭگە كولەمىندە پارا العان. ول اقشا Kaspi Gold ارقىلى اۋدارىلدى"، – دەپ بيگايداروۆ استانادا وتكەن باسپا ءسوز ءماسليحاتىندا جاۋاپ بەردى. 

سونداي-اق تەرگەۋشىنىڭ ايتۋىنشا، باسقا بانكتەردىڭ ەسەپشوتتارى ارقىلى پارا بەرۋ ارەكەتتەرى دە از ەمەس.

اتاپ ايتساق، پاۆلودار وبلىسىندا اپ-162/10 مەكەمەسى باسشىسىنىڭ مىندەتىن اتقارۋشى حاسەنوۆ پارا العانى ءۇشىن 6 ميلليون تەڭگە كولەمىندە ايىپپۇل تولەۋگە مىندەتتەلدى. ول سوتتالۋشىنىڭ جازاسىن قىسقارتۋ تۋرالى ۇسىنىستى سوتقا جولداعانى ءۇشىن 200 مىڭ تەڭگەنىڭ پاراسىن Halyk bank-تەگى ەسەپشوتىنا اۋدارتۋ ارقىلى العانى بەلگىلى بولدى.

ودان وزگە ەلىمىزدە Kiwi ءاميان، Olimp بۋكمەكەرلىك كەڭسەسىنىڭ لوگيندەرى مەن ۇيالى تەلەفونعا بالانس سالۋ ارقىلى پارا بەرىلەدى. مىسالى، باتىس قازاقستاندا ۇلتتىق ۇلاننىڭ اسكەري بولىمشە باستىعىنىڭ ورىنباسارى وماروۆ پەن كيىم-كەشەك قىزمەتىنىڭ باستىعى قىدىروۆ كاسىپكەردەن 300 مىڭ تەڭگەنىڭ پاراسىن Kiwi ءاميان ارقىلى العان.

ال قاراعاندى وبلىسىندا تۇرمە قىزمەتكەرى كۋركوۆ دەگەن ازامات 12 ميلليوننىڭ ايىپپۇلىن تولەيتىن بولدى. ول سوتتالۋشىنىڭ جاعدايىن جاقسارتقانى ءۇشىن 200 مىڭ تەڭگەنى Olimp بۋكمەكەرلىك كەڭسەسىندەگى لوگينىنە سالىپ بەرۋدى تالاپ ەتكەن.

"سولتۇستىك قازاقستاندا يسرايلوۆ دەگەن ازامات مۇگەدەكتىك تۋرالى انىقتاما ءۇشىن پارانى ۇيالى تەلەفونعا بالانس سالۋ ارقىلى بەرگەن. نەگىزى، ونداي قىلمىستاردى انىقتاۋ قيىن ەمەس. وسى سالادا پروبلەما جوق"، – دەپ ءسوزىن تۇيىندەدى بيگايداروۆ.