رف-دا قازاقستان مەن رەسەي اراسىنداعى ديپلوماتيالىق قاتىناستاردىڭ نەگىزىن قالاۋشى وراز-مۇحاممەد وندان ۇلىنىڭ تۇلعاسى مەن قىزمەتى تۋرالى حالىقارالىق كونفەرەنسيا ءوتتى. بۇل تۋرالى رەسەيدەگى قازاقستان ەلشىلىگىنىڭ باسپا ءسوز قىزمەتىنە سىلتەمە جاساپ، Qamshy.kz اقپارات اگەنتتىگى حابارلايدى.
"قازىرگى تاريحتاعى وراز-مۇحاممەد وندان ۇلىنىڭ ءرولى" اتتى عىلىمي كونفەرەنسياعا قازاقستان مەن رەسەيدىڭ تاريحشى عالىمدارى، ۋنيۆەرسيتەت پروفەسسورلارى قاتىستى.
كونفەرەنسيانى قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ اشتى.
بايانداما بارىسىندا ەلشى قازاق حالقىمەن وراز-مۇحاممەد سۇلتاندى اراعا ءۇش جارىم عاسىر سالىپ قايتا قاۋىشتىرعان جازۋشى مۇحتار ماعاۋيننىڭ "الاساپىران" رومانى ەكەنىن ەسكە سالدى.
يمانعالي تاسماعامبەتوۆتىڭ ايتۋىنشا، بارشا الاش جۇرتى ءۇشىن بايراقتى بابامىزدىڭ جات ەلدە جارتى پاتشالىق قۇرۋى اڭىزعا بەرگىسىز اقيقات.
"ال ونىڭ ەل مەن ەلدى تابىستىرعان قىزمەتى – مارتەبەلى ابىروي. ويتكەنى وراز-مۇحاممەد ورىس جەرىنە جەكە دارا كەلگەن جوق. ول بۇكىل ەل اماناتىن، ۇلى دالانىڭ دوس پەيىلى مەن بەيبىت ىقىلاسىن الا كەلدى. سودان بولار تابيعي تاكاپپارلىعى مەن باتىلدىعىنىڭ، زەرەكتىگى مەن ادىلدىگىنىڭ ارقاسىندا ۇلكەن بەدەلگە يە بولدى. وسى ەلدىڭ تاعدىرشەشتى سىن ساعاتىنا ارالاستى. اتقا قونىپ، ەڭسەلى ەرتەڭى ءۇشىن كۇرەستى. ادامدار تاريحي پروسەستەردىڭ لوگيكاسىن ۇعىنۋعا تىرىسىپ قانا قويمايدى، سونىمەن قاتار پروسەستىڭ ينەرسياسىنا اسەر ەتىپ، وقيعالاردىڭ بارىسىنا بەتبۇرىس جاساعان قاھارمان تۇلعالار تۋرالى اقيقاتتى دا بىلگىسى كەلەدى. ۇلى دالادا عانا ەمەس، جات جۇرتتا، ورىس جەرىندە داڭقتى ىستەرىمەن تانىمال بولعان سۇلتان وراز-مۇحاممەدتى وسىنداي تۇلعالاردىڭ شوعىرىنا جاتقىزۋعا بولادى"، - دەپ ەلشى ءسوزىن تۇيىندەدى.
پىكىر قالدىرۋ