دارىگەرلەردىڭ جالاقىسى 30 پايىزعا وسەدى. بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، – دەپ Qamshy.kz اقپارات اگەنتتىگى حابارلايدى.

ءمينيستردىڭ مالىمدەۋىنشە، 2020 جىلى 1 قاڭتاردان باستاپ ەلىمىزدە مىندەتتى الەۋمەتتىك مەديسينالىق ساقتاندىرۋ جۇيەسى ىسكە قوسىلادى. وسىعان وراي، جۇيەنىڭ دايىندىق دەڭگەيىن تەكسەرۋ ماقساتىندا 1 قىركۇيەكتەن باستاپ قاراعاندى وبلىسىندا مەديسينالىق ساقتاندىرۋ پيلوتتىق تۇردە ىسكە قوسىلدى. ونىڭ نەگىزگى ماقساتى – مەديسينالىق قىزمەتتى الۋشىلاردىڭ "ساقتاندىرىلۋ" ستاتۋسىن سايكەستەندىرۋ، تەگىن مەديسينالىق كومەكتىڭ كولەمىندەگى جانە مەديسينالىق ساقتاندىرۋ جۇيەسىندەگى قىزمەتتەردى جەكە-جەكە ەسەپكە الۋ ياعني 2020 جىلدان باستاپ مەديسينالىق ساقتاندىرۋ جۇيەسىن تولىعىمەن ەنگىزۋ ماقساتىندا دايىندىق جۇمىستارىن جۇرگىزۋ بولىپ تابىلادى.

جوبانى ىسكە اسىرۋ ءۇشىن بيۋدجەتتەن قوسىمشا 2،3 ملرد تەڭگە، ونىڭ ىشىندە پروفيلاكتيكالىق قاراپ-تەكسەرۋ مەن كونسۋلتاسيالىق-دياگنوستيكالىق قىزمەتتەردىڭ قولجەتىمدىلىگىن جوعارىلاتۋعا 1،7 ملرد تەڭگە، مەديسينالىق وڭالتۋدى كەڭەيتۋگە 600 ملن تەڭگەگە جۋىق قاراجات ءبولىندى.

"پيلوتتىڭ وپەراتيۆتىك دەرەكتەرى بويىنشا ەكى ايدىڭ ىشىندە وڭىردە قىمبات تۇراتىن كومپيۋتەرلىك توموگرافيا جانە ماگنيتتىك-رەزونانستى توموگرافيا قىزمەتتەرىنىڭ سانى – 178، مەديسينالىق وڭالتۋ قىزمەتتەرى – 73 جانە كونسۋلتاسيالىق-دياگنوستيكالىق كومەك قىزمەتتەرى 42 پايىزعا ۇلعايدى"، – دەدى مينيستر.

ونىڭ ايتۋىنشا، حالىق قاجەتتىلىگىنىڭ نەگىزىندە وڭالتۋدى قوسا العاندا، مەديسينالىق كومەكتىڭ باسىم تۇرلەرىن قارجىلاندىرۋ كەلەسى جىلى 7 ەسەگە جانە 2025 جىلعا قاراي 11 ەسەگە دەيىن وسەدى. تاريفتەردىڭ ءوسۋى مەديسينا قىزمەتكەرلەرىنىڭ جالاقىسىن ارتتىرۋعا مۇمكىندىك بەرەدى. كەلەسى جىلى دارىگەرلەردىڭ ەڭبەكاقىسى 30 جانە ورتا مەديسينا پەرسونالىنىڭ ەڭبەكاقىسى 20 پايىزعا ۇلعايادى.