رەسپۋبليكالىق بيۋدجەتكە 290،8 ملرد تەڭگە سالىق ءتۇستى. بۇل تۋرالى ق ر قارجى مينيسترلىگى مكك سالىق سالۋ ءادىسناماسى دەپارتامەنتى ديرەكتورىنىڭ مىندەتىن اتقارۋشى داۋلەت جارىلعاسىنوۆ ايتتى، – دەپ Qamshy.kz اقپارات اگەنتتىگى حابارلايدى.

"2019 جىلدىڭ 1 قاراشاسىنداعى جاعداي بويىنشا رەسپۋبليكادا بيۋدجەتكە جالپى 290،8 ملرد تەڭگە سالىق ءتۇستى. وسىلايشا، وتكەن جىلدىڭ 10 ايىمەن سالىستىرعاندا سالىقتىق كىرىس 20،2 ملرد تەڭگەگە ارتىپ وتىر"، – دەپ داۋلەت جارىلعاسىنوۆ وكق-دا وتكەن باسپا ءسوز ءماسليحاتىندا مالىمدەمە جاسادى.

دەپارتامەنت وكىلىنىڭ ايتۋىنشا، وڭىرلەر تۇرعىسىنان العاندا ايتارلىقتاي ءتۇسىم اتىراۋ وبلىسى (41،5 ملرد تەڭگە)، الماتى (37،0 ملرد تەڭگە) جانە نۇر-سۇلتان (30،1 ملرد تەڭگە) قالالارىنان تۇسكەن.

"سالىقتان اتالعان وڭىرلەردەن قاراجاتتىڭ كوپ ءتۇسۋىنىڭ سەبەبى بەلگىلى: اتىراۋ – مۇنايلى ءوڭىر، الماتى مەن نۇر-سۇلتان قالالارى – حالقى كوپ ءىرى قالالار. سالىق سالىناتىن كولىك قۇرالدارىنىڭ سانى 3،9 ملن-عا جەتتى. ونىڭ 3،6 ميلليونى جەكە تۇلعالارعا تيەسىلى. كولىك سالاسىنداعى سالىق تولەۋشىلەردىڭ سانى – 2 784 185 جەكە تۇلعا. مۇلىك پەن جەر سالىعىن تولەۋشىلەر سانى شامامەن 7،3 ملن ادام. ونىڭ ىشىندە مۇلىك سالىعى بويىنشا 3،8 ملن ادام، جەر سالىعى بويىنشا 3،4 ملن ادام سالىق تولەيدى"، – دەدى ول.