اقش يراندا بەنزين باعاسىنىڭ قىمباتتاۋىنا نارازى ازاماتتارعا بيلىكتىڭ كۇش قولدانىپ، ينتەرنەت پەن ءموبيلدى بايلانىستى وشىرگەنىن ايىپتادى، دەپ حابارلايدى azattyq.org. اق ءۇي 17 قاراشادا بەيبىت نارازىلىق اكسياسىنا شىققان يران حالقىن "قولداۋ" بىلدىرەتىنى تۋرالى مالىمدەمە تاراتتى.
"دەمونسترانتتارعا قارسى كۇش قولدانۋدى جانە بايلانىستى شەكتەۋدى ايىپتايمىز" دەپ مالىمدەدى اق ءۇي اكىمشىلىگى.
يران ۇكىمەتىنىڭ بەنزين باعاسىن قىمباتتاتىپ (ءبىر ليتر بەنزين 13 سەنتكە قىمباتتادى)، جانار-جاعار مايدى ساتۋعا شەكتەۋ ەنگىزۋى تۇرعىنداردىڭ نارازىلىعىن تۋدىردى. حابارلارعا قاراعاندا، جۇزگە جۋىق ەلدىمەكەندە قارسىلىق اكسيالارى وتكەن. يران بيلىگى جاپپاي نارازىلىققا قاتاڭ شارا قولداناتىنىن ەسكەرتتى.
يراننىڭ رۋحاني كوسەمى اياتوللا ءالي حامەنەي 17 قاراشادا ۇكىمەتتىڭ بەنزين باعاسىن قىمباتتاتۋ تۋرالى شەشىمىن قولدايتىنىن مالىمدەدى. نارازىلىق بارىسىندا "بىرنەشە ادام ءولىپ، كەي نىساندار قيراتىلعانىن" ايتقان حامەنەي دەمونسترانتتاردى "باسكەسەرلەر" دەپ اتادى. ول "قوعامعا ىرىتكى سالعان" يراننىڭ "جاۋلارىن" ايىپتادى.
يراننىڭ فارس جاڭالىقتار اگەنتتىگى مىڭعا جۋىق ادام تۇتقىندالدى دەپ حابارلادى. مەملەكەتتىك باسىلىمدار "نارازىلىق كەزىندە جۇزدەن استام بانك پەن دۇكەن ورتەنگەن" دەگەن اقپارات تاراتتى. بۇعان دەيىن رەسمي ورىندار نارازىلىق اكسياسى كەزىندە ءبىر ادام قازا تاپقان دەپ حابارلاعان. الايدا بەلسەندىلەر بىرنەشە ادامنىڭ ولگەنىن ايتتى. ونداعان ادام زارداپ شەككەن.
الەۋمەتتىك جەلىلەردە جانار-جاعار ماي بەكەتتەرى مەن بانك مەكەمەلەرى ورتەنىپ، پوليسەيلەر مەن نارازىلاردىڭ قاقتىعىسقانى تۋرالى ۆيدەولار مەن سۋرەتتەر تارادى.
پىكىر قالدىرۋ