ايماق باسشىسىنىڭ وكىمىمەن بۇل لاۋازىمعا وبلىس اكىمىنىڭ ورىنباسارى مىندەتىن اتقارعان شالقار زامانبەك ۇلى بايبەكوۆ تاعايىندالدى. ول 2017 جىلدان بەرى اۋىل شارۋاشىلىعى، تابيعي رەسۋرستار، جەر قاتىناستارى مەن ۆەتەريناريا سالالارىنا جەتەكشىلىك ەتتى.

اۋدان اكتيۆىنە جاڭا اكىمدى دانيال احمەتوۆ تانىستىردى.

– شالقار زامانبەك ۇلى وتە تاجىريبەلى باسقارۋشى. ونىڭ كانديداتۋراسىن ءماسليحات دەپۋتتارى ءبىراۋىزدان قولدادى. ول ءوزىنىڭ تاجىريبەسىن بەسقاراعاي اۋدانىن دامىتۋ بارىسىنداعى ماڭىزدى ماسەلەلەردى شەشۋدە قولداناتىنىنا سەنىمدىمىن، – دەدى شىعىس قازاقستان اكىمى.

 ايتا كەتسەك، شالقار بايبەكوۆ 1967 جىلى 6 اقپاندا بۇرىنعى سەمەي وبلىسى، اباي اۋدانىندا دۇنيەگە كەلگەن. 1996 جىلى قازاق مەملەكەتتىك باسقارۋ اكادەمياسىن «ەكونوميكا» ماماندىعى، كەيىن قازاق مەملەكەتتىك زاڭ اكادەمياسىن «زاڭگەر» ماماندىعى بويىنشا ءتامامدادى.

قىزمەت جولىن 1988 جىلى سەمەي وبلىسى جاڭاسەمەي اۋداندىق ينسپەكسياسىنىڭ مەملەكەتتىك ساقتاندىرۋدىڭ   اعا ينسپەكتورى بولىپ باستادى.

 1990 جىلدىڭ شىلدە ايىنان باستاپ سەمەي سالىق ينسپەكسياسى سالاسىندا قىزمەت ەتتى. 1999 جىلى پاۆلودار قالاسى، كەيىن استانا مەن قاراعاندى قالالارىندا سالىق كوميتەتىنىڭ ءتوراعاسى بولىپ جۇمىس ىستەدى.

2008 جىلدان 2014 جىلعا دەيىن استانا قالاسى سالىق دەپارتامەنتىنىڭ  ەسىل اۋدانى بويىنشا  سالىق باسقارماسىن باسقاردى. كەيىن قازاقستان رەسپۋبليكاسى پرەزيدەنتى اكىمشىلىگىنىڭ  مەملەكەتتىك باقىلاۋ  جانە ۇيىمدىق-اۋماقتىق جۇمىس ءبولىمىنىڭ مەملەكەتتىك ينسپەكتورى بولدى.

شقو اكىمىنىڭ باسپا ءسوز قىزمەتى