وڭتۇستىك استانادا Almaty Investment Forum 2019 باستالدى. وعان 700-دەن استام ىسكەر توپتاردىڭ وكىلدەرى قاتىسۋدا.

فورۋمدا ءسوز العان قالا اكىمى باقىتجان ساعىنتايەۆ ىسكەرلىك باسقوسۋدىڭ الماتىعا قار جاۋعان شاقپەن قاتار كەلگەنىن اتاپ ءوتىپ، فورۋم قاتىسۋشىلارىن شاھاردىڭ عانا ەمەس، تۇتاس ەل ماقتانىشى – شىمبۇلاق تاۋ-شاڭعى كەشەنىنە دەمالۋعا شاقىردى.

– سىزدەرمەن ينۆەستيسيالىق مۇمكىندىكتەردى تالقىلاۋعا جانە ىسكەرلىك بايلانىستاردى ورناتۋعا زور مۇمكىندىك بەرەتىن الماتىنىڭ باستى الاڭى – بۇگىنگى ينۆەستيسيالىق فورۋمدا قاۋىشقانىما شىن جۇرەكتەن قۋانىشتىمىن. فورۋم جۇمىسىنىڭ جەمىستى بولارىنا كامىل سەنەمىن! ءقازىر الماتىدا ەڭ باتىل جوسپارلار مەن ءىرى ينۆەستيسيالاردى جۇزەگە اسىرۋ ءۇشىن اسا قولايلى كەزەڭ.  ءبىز، ءوزىمىزدىڭ ينۆەستيسيالىق يدەيامىزدى ۋوررەن باففەت ءپرينسيپى نەگىزىندە ءبىر ۇسىنىسپەن قالىپتاستىرۋعا تىرىسامىز. بۇگىن الماتى قالاسىنا ۇلكەن سەنىم بىلدىرسەڭىزدەر، الماتىنىڭ جەتىستىگى سىزدەردىڭ دە تولايىم تابىستارىڭىزعا اينالماق. ءبىز نەنى مەڭزەپ وتىرمىز؟ ءىس جۇزىندە بۇل فورۋم – الماتىدا الداعى 30 جىلعا ارنالعان دامۋ ستراتەگياسى قالىپتاسىپ جاتقان تاريحي ساتتە وتۋدە، – دەگەن اكىم جاقىندا عانا الماتىنىڭ 2050ء-شى جىلعا دەيىنگى دامۋ ستراتەگياسى ازىرلەنىپ، ول قالا تۇرعىندارىنىڭ كەڭ تالقىلاۋىنا ۇسىنىلعانىن اتاپ ءوتتى.

– الماتى –  2050 ستراتەگياسىنىڭ نەگىزگى ماقساتى – ءومىر ساپاسى مەن بيزنەس مۇمكىندىكتەرى جوعارى الەمنىڭ ەڭ ۇزدىك 100 قالاسىنىڭ قاتارىنا ەنۋ. ول ءۇشىن مىقتى ەكونوميكالىق نەگىز قاجەت. قالا ەكونوميكاسى جىلىنا كەمىندە 5% قارقىنمەن دامۋى ءتيىس. مۇنداي ءوسۋدى قامتاماسىز ەتۋ ءۇشىن، ءبىز، قالالىق ەكونوميكانىڭ تەرەڭ قۇرىلىمدىق رەفورمالارىن باستايمىز. باسىمدىق جاڭا ەكونوميكا سەكتورلارىنا جاسالادى. ءبىزدىڭ ناق وسى قۇرىلىمدىق مانيەۆرىمىز ينۆەستيسيالاۋ ءۇشىن تۇبەگەيلى جاڭا ورىستەرگە جول اشپاق، –  دەدى اكىم.