Almaty Investment Forum 2019 بارىسىندا قالا اكىمى باقىتجان ساعىنتايەۆ الماتىدا بارىنشا الەۋەتى 8 باستى كرەاتيۆتى يندۋستريالار انىقتالعانىن جانە ولاردى دامىتۋعا باستى نازار اۋدارىلاتىنىن ايتتى:

بىرىنشىدەن، كينو جانە انيماسيا.

الماتى كينو ءوندىرىسى ءۇشىن قولايلى قالا بولىپ تابىلادى. قالادا ورتا ەسەپپەن جىلدىڭ 220 كۇنىندە اۋا رايى جىلى.

بەس كليماتتىق ايماق، كەرەمەت پەيزاجدار مەن دامىعان ينفراقۇرىلىم كەز كەلگەن جانرداعى، ايتالىق، تاريحيدان فەنتەزيگە دەيىنگى فيلمدەردى تۇسىرۋگە زور مۇمكىندىكتەر بەرەدى.

ءقازىردىڭ وزىندە الماتى مەن الماتى وبلىسىن الەمنىڭ ءتۇرلى ەلدەرىنەن كەلىپ بەينەباياندار، جارناما مەن دەرەكتى فيلمدەر ءتۇسىرۋ ءۇشىن ستۋديالار كەلۋدە.

بارلىق قاجەتتى جاعداي تۋعىزۋ ءۇشىن قالا اكىمدىگى جانىنان ارنايى ورگان – Almaty Film Commission قۇرىلادى.

بۇل قۇرىلىم ءبىر تەرەزە قاعيداتى بويىنشا، الماتىدا جانە وسى ايماقتا دا تۇسىرىلىمدەردى ۇيىمداستىرۋدا شەتەلدىك جانە وتاندىق كينوكومپانيالارعا قولداۋ كورسەتەتىن بولادى.

كينوبيزنەس، ءبىلىم مەن مەملەكەت وكىلدەرىنىڭ تىعىز بايلانىسىنىڭ ارقاسىندا ءبىز وتاندىق كينەماتوگرافتى دامىتىپ، الماتىنى الەمدىك كينونىڭ ءتۇسىرۋ الاڭى جاسايمىز. بۇل تەك قالامىزدىڭ عانا بەدەلىن كوتەرىپ قويمايدى، سونىمەن قاتار تۋريزم مەن شاعىن جانە ورتا بيزنەستىڭ  دامۋىنا سەپتىگىن تيگىزەدى.

انيماسيا وندىرىسىنە ارنايى توقتالعىم كەلەدى. الماتىنىڭ انيماسيالىق مەكتەبى كەڭەس داۋىرىندە-اق بيىك ناتيجەلەرگە قول جەتكىزدى.

ءقازىر انيماسيا ستۋديالارى جوق ەسەبى، بۇل دا ينۆەستيسيالار ءۇشىن قوسىمشا ۇلكەن رەزەرۆ. بىزدەگى انيماتورلار الەۋەتىنىڭ زور ەكەندىگىنە سەنىمىم مول، ەندى سولاردى جۇزەگە اسىرۋ قاجەت.

ەكىنشىدەن، مۋزىكا.

الماتى – «مۋزىكا» باعىتى بويىنشا يۋنەسكو-نىڭ كرەاتيۆتى قالالار جەلىسىنە كىرەتىن ورتالىق ازياداعى جالعىز قالا.

ءبىزدىڭ ورىنداۋشىلارىمىز ىشكى جانە سىرتقى نارىقتا سۇرانىسقا يە تۋىندىلار جاساي الاتىنىن سان مارتە دالەلدەدى.

يندۋستريا، مەملەكەت، بيزنەس جانە ءبىلىم بەرۋ وكىلدەرىنىڭ بىرلەسۋىمەن الماتىلىق مۋزىكانتتاردى قولداۋ ءۇشىن ارنايى پلاتفورمالار قۇرىلاتىن بولادى.

جاسالعان ونىمدەر – iTunes، yandex، spotify تاعى دا باسقا زاماناۋي ساندىق قۇرالدار ارقىلى تاراتىلاتىن بولادى.

ۇشىنشىدەن، ادەبيەت.

بۇگىنگى كۇنى بۇل يندۋستريا باسقالارىنا قاراعاندا مەملەكەتتىك قولداۋدى كوبىرەك قاجەت ەتەدى. ەڭ الدىمەن، مەن جاس تالانتتار تۋرالى ايتىپ وتىرمىن.

جازۋشىلار مەن وقىرماندارعا قاجەتتى بارلىۇ جاعداي جاسالادى. الماتىداعى بارلىق كىتاپحانالار جوندەلىپ، قوسىمشا جاڭالارى سالىنادى.

ول جەرلەر تەك قانا كىتاپحانا ەمەس، قوعامدىق كەڭىستىككە اينالادى.

ول كىتاپحانالاردا ءبىز جاس قالامگەرلەردى ءوز تۋىندىلارىن iTunes، yandex، bookmate، amazon سەكىلدى ساندىق قۇرالدار ارقىلى تابىستى ساتۋ جانە ىلگەرىلەتۋ ادىستەرىنە ۇيرەتەتىن بولامىز.

بىزدە وزىندىك قولتاڭباسى بار، مادەني جانە تاريحي مۇرالار انا سۇتىمەن دارىعان شىنايى تالانتتى جازۋشىلار بار. ءتيىستى قولداۋدىڭ ارقاسىندا ءبىزدىڭ جازۋشىلارىمىز دۇنيەجۇزى بويىنشا ءوز وقىرماندارىن تابارىنا سەنىمدىمىن.

تورتىنشىدەن، تەاتر،وپەرا، بالەت.

كلاسسيكالىق ونەردى دامىتۋ مەن ولاردى دوتاسيالاۋ دەڭگەيىن تومەندەتۋ ءۇشىن الماتىدا ارنايى قالانىڭ تەاتر ونەرىن دامىتۋ ستراتەگياسى جاسالادى. باستى ماقسات – تەاتردى تەك قالا تۇرعىندارى ءۇشىن عانا ەمەس، جاقىن قالالار مەن ەلدەر ءۇشىن دە تارتىمدى ەتۋ. ءبىز تەاترعا بارۋ مادەنيەتىن قايتا جاڭعىرتۋىمىز قاجەت.

بۇعان ءبىز اۋقىمدى الەمدىك دەڭگەيدەگى ساحنا، وپەرا جانە بالەت جۇلدىزدارىن تارتىپ، تەاتر فەستيۆالدارىن وتكىزۋ ارقىلى قول جەتكىزەمىز.

الماتىنىڭ مادەني مۇراسى مەن ءبىلىم بازاسىن ەسكەرسەك، قالانىڭ ورتالىق ازياداعى ساحنا ونەرىنىڭ ورتالىعى بولۋعا تولىق مۇمكىندىگى بار. وسىلايشا، ورتالىق-ازيالىق ايماقتىڭ تۇكپىر-تۇكپىرىنەن وسى ونەر تۇرلەرىن سۇيەتىندەردى تارتۋعا بولادى.

الەمدىك دەڭگەيدەگى شەديەۆرلەر جاساۋعا قاجەتتى الەۋەت بىزدە بار، ءبىزدىڭ مىندەتىمىز – سونىڭ تولىق اشىلۋىنا جاعداي جاساۋ.

بەسىنشىدەن، ديزاين جانە ساۋلەت.

الماتى – قازاقستاندىق ساۋلەتشىلەردى دايىندايتىن ەڭ باستى ورتالىق.

الماتىدا ەلىمىز بەن شەتەلدە دە تانىمال ساۋلەت جانە ديزاين بيۋرولارى كوپتەپ اشىلۋدا.

اكىمدىك الماتىنىڭ بىرەگەي تاريحي عيماراتتارى تۋرالى مالىمەتتەردى جيناي باستادى، سوسىن ولار ءتيىستى كاتالوگقا ەنگىزىلەتىن بولادى. ءبىز الماتىداعى ساۋلەت سالاسىنىڭ تاريحي ساباقتاستىعىن ساقتاۋىمىز كەرەك.

ءبىرىڭعاي ساۋلەتتىك جانە ديزاينەرلىك كودتى جاساپ، قالامىزداعى بولاشاق وبەكتىلەردىڭ قۇرىلىسىنا ەنگىزەمىز. قازىرگى ديزاين تاريحي عيماراتتارمەن ۇيلەسۋى ءتيىس. جاڭادان سالىنعان ءاربىر وبەكت قالامىزدى تارتىمدى ەتىپ، ەرەكشەلەي ءتۇسۋى قاجەت.  

 التىنشىدان، ءسان.

سوڭعى جىلدارى بۇل سالا قارقىندى دامىپ كەلەدى. ءبىرىنشى كەزەكتە، جەكە باستامالاردىڭ ارقاسىندا.

قازاقستانداعى ءسان يندۋسترياسىنىڭ – ءالى جۇزەگە اسپاي كەلە جاتقان ۇلكەن مۇمكىندىكتەرى مەن الەۋەتى بار. وسى ەرەكشە سالانى دۇرىس دامىتا بىلسەك، الەمگە ۇلى دالا وركەنيەتىنىڭ داستۇرلەرىنە نەگىزدەلەتىن ءسان ونەرىن، وعان دەگەن شىنايى كوزقاراسىمىزدى ۇسىنا الارىمىز انىق.

جەتەكشى ءسان ۇيلەرى مەن زەرگەرلەر الەم جۇرتشىلىعىن اتا-بابالارىمىزدىڭ «اڭ ستيلىمەن»، حالىقتىڭ قولدانبالى ويۋ-ورنەكتەرىمەن شابىتتاندىراتىن بولادى.

الماتىداعى ءسان كورسەتىلىمدەرى ءداستۇرلى ءىس-شارالار عانا ەمەس، سونداي-اق ءسان يندۋسترياسىنىڭ پروبلەمالارىن تالقىلاپ، ونى شەشۋ جولدارىن ىزدەستىرەتىن الاڭعا اينالۋى ءتيىس.

ءبىز، جۇمىسىن جاڭا باستاعان جاس ديزاينەرلەرگە شەبەرحانالار ۇسىنىپ، ونىمدەرىن ىشكى نارىقتا ناسيحاتتاۋعا كومەكتەسەمىز.

جەتىنشىدەن، جاڭا مەديا جانە سيفرلىق مادەنيەت.

جاڭا مەديا – بۇل الماتىدا پايدا بولىپ، قارقىندى دامىپ كەلە جاتقان ينتەراكتيۆتى ەلەكتروندىق باسىلىمدار. ونىڭ دامۋى الەۋمەتتىك جەلىلەر مەن بلوگ-پلاتفورمالار تانىمالدىعىنىڭ ارتۋىنا دا تىكەلەي سەرپىن بەردى.

YouTube، Instagram، Twitter سەكىلدى پلاتفورمالار ءتيىمدى كونتەنت قۇرىپ، جاقسى تابىس تابۋعا مۇمكىندىك بەردى.

وسىلايشا، ءبىزدىڭ جاستارىمىز ۇلكەن جەتىستىكتەرگە قول جەتكىزىپ وتىر. ولار  قازاقستاندا عانا ەمەس، سونىمەن قاتار تمد ەلدەرىندە دە ءبىرشاما تانىمال. مۇنداي قىزىعۋشىلىققا قولداۋ كورسەتىپ، ءارى قاراي دامىتۋىمىز قاجەت.الماتىنىڭ اۋديوۆيزۋالدى كونتەنتىنىڭ دامۋىن ەسكەرە وتىرىپ، بىزدە بۇكىل ورتالىق ازيانى قامتيتىن نارىق قالىپتاستىرۋدىڭ العىشارتتارى بار.

سەگىزىنشىدەن، ويىن-ساۋىق يندۋسترياسى: قوعامدىق كەڭىستىكتەر، مۋزەيلەر.

الماتى قالاسىنىڭ «كۇن بەلدەۋى» ۇلكەن اتتراكسيوندار پاركىن قۇرۋعا مۇمكىندىك بەرەدى، ولار تەك قازاقستان وڭىرلەرىنىڭ تۇرعىندارى ءۇشىن عانا ەمەس، شەتەلدىك تۋريستەر ءۇشىن دە تارتىلىس ايماعىنا  اينالادى.

ءبىز وقيعالى ءتۋريزمدى دامىتامىز. ەل ىشىندە دە، شەت ەلدەن كەلگەن قوناقتاردى دا تارتاتىن كونسەرتتەر، شوۋ، فەستيۆالدار، قويىلىمدار وتكىزۋ قاجەت.

سونداي-اق ويىن تۇرىندە وقىتۋعا (edutaintment) نەگىزدەلگەن نىسانداردى دامىتۋ قاجەت. بۇل مۋزەيلەر، كورمەلەر جانە باسقا دا قوعامدىق كەڭىستىك، مۇندا تۇرعىندار مەن قوناقتار، اسىرەسە بالالار ويىن-ساۋىق ارقىلى ەلىمىزدىڭ، قالامىزدىڭ، ولكەمىزدىڭ باي تاريحىن تانيدى. 

الماتى مۇراجايلارى ينتەراكتيۆتى جانە ويىن-ساۋىققا يكەمدى، وسكەلەڭ ۇرپاق ءۇشىن سيفرلىق ورتاعا بەيىمدەلگەن جاڭاشا باعىتتارمەن قىزىقتى بولۋعا ءتيىس.

مەن الماتىدا مەگاپوليستىڭ عىلىمي-اعارتۋشىلىق جانە كوممۋنيكاتيۆتىك ورتالىعىنا اينالاتىن جاڭا گالەرەيا نەمەسە زاماناۋي ونەر مۇراجايىن قۇرۋدى ۇسىنامىن.