الماتى اكىمى باقىتجان ساعىنتايەۆ ءتيىن ءمۇسىنىنىڭ تاعدىرى جەلتوقسان ايىندا شەشىلەتىنىن ايتتى، – دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ. بۇل تۋرالى ول ەلوردادا ورتالىق كوممۋنيكاسيالار بريفينگىندە جۋرناليستەردىڭ سۇراعىنا جاۋابىندا ايتتى.

– جۇرتقا الماتىداعى ءتيىن ماسەلەسى بارىنەن دە قىزىق. باسقا تىرلىكتىڭ ءبارى، باسقا جۇمىستىڭ ءبارى ورنىندا، جۇرتتىڭ كوڭىل-كۇيى ورنىندا، جۇمىستىڭ ءبارى شەشىلگەن بولىپ، بۇكىل پروبلەما سول تيىنگە تىرەلىپ تۇرسا، وعان مەن قۋانامىن، – دەدى اكىم.

ساعىنتايەۆتىڭ ايتۋىنشا، ءتيىن ءمۇسىنى – جەكە جوبا. 

"وزدەرىڭىز بىلەسىزدەر، ول ساماننان جاسالعان. بۇگىندە توزىعى جەتكەندىكتەن ءۇستىن جاۋىپ قويدى. سول جەكە جوبانىڭ جەتەكشىلەرى باسقارماعا شىعىپ، ءوز ۇسىنىستارىن، قالاي جانداندىرۋدىڭ جولدارىمەن اينالىسىپ جاتىر. ەگەر وسى جەلتوقساندا جوبالار ۇسىنىلىپ، تۇرعىندارمەن كەلىسىلەتىن بولسا، وندا بىزدە قارسىلىق جوق"، – دەدى الماتى اكىمى.

ەسكە سالساق، بۇل ارت-نىسان 2018 جىلدىڭ جازىندا "اتاكەنتتە" ورنالاستىرىلعان ەدى. باستاپقىدا ونىڭ باعاسى 23 ميلليون تەڭگە بولعان. اۆتورى ۇلىبريتانيالىق سۋرەتشى، ءمۇسىنشى، پلەيسمەيكەر الەكس رينسلەر. الايدا كەيىن ونىڭ توزىعى جەتكەنى ايتىلىپ، ءتۇرلى ۇسىنىس ايتىلا باستادى. ونىڭ رەكونسترۋكسياسىنا اۆتورلار كراۋدفاندينگ ارقىلى 10 ميلليون تەڭگە جيناعىسى كەلگەن. كەيىن ونى الىپ تاستاۋ تۋرالى ۇسىنىس ايتىلعان.