ترەنينگتىك ورتالىقتىڭ العاشقى كۋرسىنا مينيسترلەر – ەلجان ءبىرتانوۆ، اسحات ايماعامبەتوۆ، ەرلان تۇرعىمبايەۆ، اقتوتى رايىمقۇلوۆا، ءبىرجان نۇرىمبەتوۆ جانە نۇر-سۇلتان اكىمى التاي كولگىنوۆ قاتىستى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ.
قازاقستاننىڭ مينيسترلەرى امەريكا كارديولوگيا قاۋىمداستىعىنىڭ بازالىق جۇرەك رەانيماسياسى كۋرسىنان ءوتتى، دەپ حابارلادى دەنساۋلىق ساقتاۋ مينيسترلىگىنىڭ شۇعىل مەديسينا بويىنشا ۇلتتىق ۇيلەستىرۋ ورتالىعى.
سونىڭ نەگىزىندە بازالىق جانە كەڭەيتىلگەن جۇرەك رەانيماسياسىن (BLS، ACLS) وقىتۋدان حالىقارالىق ترەنينگتىك ورتالىق اشىلعان بولاتىن. امەريكا كارديولوگيا قاۋىمداستىعىنىڭ اككرەديتاسياسىنان وتكەن ونداي ورتالىق تمد اۋماعىندا العاش رەت اشىلىپ وتىر.
حالىقارالىق ترەنينگتىك ورتالىق قازاقستان حالقىنىڭ قان اينالىمى جۇيەسى اۋرۋلارىن، سونىڭ ىشىندە ەمدەۋگە دەيىنگى كەزەڭدە ءولىم-جىتىمدى ازايتۋ ءۇشىن اشىلعان. نەگىزگى ماقساتى – ءبىرىڭعاي ستاندارتتار بويىنشا مەديسينا قىزمەتكەرلەرىن، سونداي-اق رەسپۋبليكا حالقىن بازالىق رەانيماسيا (BLS) شارالارىن كورسەتۋگە ۇيرەتۋ.
ورتالىقتىڭ العاشقى كۋرسىنان قازاقستاننىڭ دەنساۋلىق ساقتاۋ ءمينيسترى ەلجان ءبىرتانوۆ، عىلىم جانە ءبىلىم ءمينيسترى اسحات ايماعامبەتوۆ، ىشكى ىستەر ءمينيسترى ەرلان تۇرعىمبايەۆ، مادەنيەت جانە سپورت ءمينيسترى اقتوتى رايىمقۇلوۆا، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جانە نۇر-سۇلتان قالاسىنىڭ اكىمى التاي كولگىنوۆ ءوتتى.
"قازاقستاننىڭ اۋماعىندا حالىقارالىق ترەنينگتىك ورتالىق قۇرۋ شۇعىل مەديسينا، توتەنشە جاعدايلار قىزمەتى جانە قۇقىق قورعاۋ ورگاندارى قىزمەتكەرلەرىنىڭ بازالىق جانە كەڭەيتىلگەن رەانيماسياسىن كورسەتۋدى ۇزدىكسىز جانە ساپالى وقىتۋدىڭ سەنىمدى جۇيەسىن قۇرۋعا مۇمكىندىك بەرەدى"، - دەيدى دەنساۋلىق ءمينيسترى ەلجان ءبىرتانوۆ.
ايتا كەتەيىك، امەريكا كارديولوگيا قاۋىمداستىعى (AHA) كارديولوگيا سالاسىندا مەديسينالىق زەرتتەۋلەرمەن، كارديولوگيالىق اۋرۋلاردان تۋىنداعان مۇگەدەكتىك پەن ءولىم-جىتىمدى تومەندەتۋ ماقساتىندا ءتيىستى مەديسينالىق كومەككە ىقپال ەتەتىن سالاۋاتتى ءومىر سالتى تۋرالى ءبىلىم بەرۋ جوبالارىمەن اينالىساتىن اقش-تاعى كوممەرسيالىق ەمەس ۇيىم بولىپ سانالادى.
پىكىر قالدىرۋ