بۇگىن بۇل تۋرالى وڭىرلىك كوممۋنيكاسيالار قىزمەتىندە ق ر سىبايلاس جەمقورلىققا قارسى ءىس-قيمىل اگەنتتىگى جامبىل وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەبايەۆ ايتتى.
بۇگىنگى كۇنى تاراز قالاسى بويىنشا مەملەكەتتىك تۇرعىن ءۇي قورىنان باسپانا الۋ كەزەگىندە 18 565 ادام تۇر، ونىڭ ىشىندە: 1954ء-ى – جەتىمدەر، 1784ء-ى – كوپ بالالى وتباسىلار، 8953ء-ى – تۇرعىنداردىڭ الەۋمەتتىك وسال توبىنا جاتاتىندار، 5874ء-ى مەملەكەتتىك قىزمەتىشىلەر، بيۋدجەتتىك ۇيىمدار قىزمەتكەرلەرى مەن اسكەري قىزمەتشىلەر.
تۇرعىن ءۇي كوميسسياسىنىڭ مۇقتاج ازاماتتارعا مەملەكەتتەن باسپانا ءبولۋ تۋرالى شەشىمىن لاۋازىمدى تۇلعالار باقىلاۋشىلاردىڭ قاتىسۋىنسىز قابىلدايدى، ياعني جۇمىستىڭ اشىقتىعى قامتاماسىز ەتىلمەگەن. بەينە جانە اۋديو جازبانىڭ جۇرگىزىلمەۋى دە كوميسسيا مۇشەلەرىنىڭ شەشىم قابىلداۋداعى جاۋاپكەرشىلىگىنە كەرى اسەر ەتەرى ءسوزسىز. وسىعان بايلانىستى، تۇرعىن ءۇي كوميسسياسى وتىرىسىنىڭ مىندەتتى تۇردە بەينە جانە اۋديوتاسپاعا جازىلىپ، الەۋمەتتىك جەلى ارقىلى تىكەلەي ەفيردە كورسەتىلۋى قاجەت.
كەزەكتەگىلەردىڭ ءتىزىمىن زەردەلەۋ، بيىلعى جىلدىڭ 3 مامىرىندا پاتەر العان كەيبىر ازاماتتاردىڭ 2017 جانە 2018 جىلعى كەزەك تىزىمىندە جوقتىعىن كورسەتتى. مەملەكەتتىك قوردان بولىنگەن كەيبىر پاتەرلەردە ەشكىم تۇرمايتىنى، كەيبىرىنىڭ جالعا بەرىلگەنى انىقتالدى.
جەرگىلىكتى اتقارۋشى ورگان تاراپىنان مەملەكەتتىك قوردان بولىنگەن تۇرعىن ۇيلەردىڭ پايدالانىلۋى بويىنشا شارالار قابىلدانىپ جاتقان جوق. جۇرگىزىلگەن تالداۋ ناتيجەسىمەن، سىبايلاس جەمقورلىق كورىنىستەرىنىڭ پايدا بولۋ شارتتارى مەن سەبەپتەرىن جويۋ ماقساتىندا ءتيىستى جەرگىلىكتى اتقارۋشى ورگاندارعا ۇسىنىستار بەرىلدى.
پىكىر قالدىرۋ