قازاقستان پرەمەر-مينيسترىنىڭ ورىنباسارى بەردىبەك ساپاربايەۆ اتاۋلى الەۋمەتتىك كومەككە قۇجات تاپسىرۋ جانە الۋ تەتىگىن ءتۇسىندىردى. ول قازاقستاندىقتاردان دۇربەلەڭگە سالىنباۋدى سۇرادى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ.
"دۇربەلەڭ جاساۋدىڭ قاجەتى جوق. ءتىزىمدى ناقتىلاپ الۋ كەرەك، سودان كەيىن حقكو-دا اتاۋلى الەۋمەتتىك كومەك تولەۋدىڭ جاڭا تەتىگىن تۇسىندىرەدى. ءبىز جاڭا مەحانيزم ەنگىزىپ جاتىرمىز. جاردەماقىنىڭ ءۇش ءتۇرى بولادى"، - دەدى بەردىبەك ساپاربايەۆ قازاقستان رەسپۋبليكاسى ءماسليحاتتارىنىڭ قۇرىلعانىنا 25 جىل تولۋىنا ارنالعان رەسپۋبليكالىق كونفەرەنسيانىڭ كۋلۋارىندا.
جاردەماقىنىڭ ءبىرىنشى ءتۇرى – ءتورت نەمەسە ودان دا كوپ بالا تاربيەلەپ وتىرعان وتباسىلارعا بەرىلەتىن مەملەكەتتىك ارنايى جاردەماقى. ول تابىسىنا قاراماستان كەز كەلگەن كوپ بالالى وتباسىعا تولەنەدى.
ەكىنشى ءتۇرى – اتاۋلى الەۋمەتتىك كومەك (ااك). بۇل جاردەماقى ەڭ تومەنگى كۇنكورىس دەڭگەيىنە شاققانداعى وتباسىنىڭ جيىنتىق كىرىسىنە بايلانىستى بۇرىنعى تەتىككە سايكەس تولەنەدى.
ءۇشىنشى ءتۇرى – كەپىلدەندىرىلگەن الەۋمەتتىك پاكەت.
بۇعان دەيىن حابارلانعانداي، قازاقستاننىڭ حالىققا قىزمەت كورسەتۋ ورتالىقتارىندا ااك الۋشىلاردىڭ سالدارىنان دۇربەلەڭ تۋىپ، ۇزىن-سونار كەزەك پايدا بولعان. كوبىسى جاردەماقى الۋعا قۇجات تاپسىرۋ مەرزىمى شەكتەۋلى دەپ ويلاعان.
پرەمەر-مينيستر ورىنباسارىنىڭ ايتۋىنشا، ەشقانداي شەكتەۋ جوق. قاڭتارداعى مەرەكەلەردە حالىققا قىزمەت كورسەتۋ ورتالىقتارىندا دۇربەلەڭ تۋدىرماۋ ءۇشىن ادامدارعا قاجەتتى قۇجاتتار پاكەتىن دايىنداۋ تۋرالى الدىن الا حابارلانادى.
اتاۋلى الەۋمەتتىك كومەك الۋشىلاردىڭ تىزىمىندە بار-جوق ەكەنىڭىزدى ەڭبەك مينيسترلىگىنىڭ سايتىندا تەكسەرە الاسىز.
پىكىر قالدىرۋ