24 جەلتوقساندا ءبىر توپ ازامات الماتىداعى اكىمشىلىك جازاعا تارتىلعانداردى ۋاقىتشا قاماۋ مەكەمەسىندە وتىرعان بەلسەندىلەردى قولداۋ ماقساتىندا سول مەكەمە عيماراتىنىڭ الدىندا اكسيا وتكىزدى. اكسياعا شامامەن 50-گە جۋىق ازامات قاتىستى.
جينالعاندار قولدارىنا قازاقستان تۋىن ۇستاپ، بەيبىت جيىنعا قاتىسقانى ءۇشىن قامالعان بەلسەندىلەردى بوساتۋدى تالاپ ەتتى. اكسياعا جينالعان ازاماتتاردىڭ اراسىندا "قازاقستاننىڭ دەموكراتيالىق پارتياسىن" قۇرۋعا ىنتالى باستاماشىل توپتىڭ مۇشەلەرى جانبولات ماماي مەن ىرىسبەك توقتاسىن بار.
جينالعاندار "قازاقستاننىڭ بارلىق بەلسەندىلەرى جانە ساياسي تۇتقىندارى بوساتىلسىن" دەگەن تالاپ قويىپ، "بيلىك زاڭدى بەلشەدەن باسۋدى قويسىن. تالدىقورعاندا جاتقان بەس باتىرىمىزدى بوساتۋدى تالاپ ەتەمىز" دەپ ۇرانداتتى.
بەلسەندى ساقىپ جاڭابايەۆا "باسىزدىقتى توقتاتىڭدار. تۇرمەگە قاماۋدى توقتاتىڭدار. سەندەر ءبىزدىڭ بوستاندىعىمىزدى شەكتەپ وتىرسىڭدار" قازاقستاننىڭ جوعارى بيلىگىن سىنعا الدى.
– ارون اتابەك، مۇحتار جاكىشيەۆ جانە تاعى دا باسقا ساياسي تۇتقىنداردى بوساتۋىن تالاپ ەتەمىن. ولاردىڭ ورنىنا بيلىكتەگىلەردىڭ ءوزىن وتىرعىزۋ كەرەك. باسسىزدىقتى توقتاتىڭدار. تۇرمەگە قاماۋدى توقتاتىڭدار. سەندەر ءبىزدىڭ بوستاندىعىمىزدى شەكتەپ وتىرسىڭدار. 16 جەلتوقساندا كوپتەگەن بەلسەندىلەردىڭ ەركىندىگىن شەكتەدىڭدەر. 16-سى كۇنى تاڭنان قۇرمانعازى نايزابەكتى، ارون اتابەكتىڭ اپكەسى مادينا حابيبوللانى، ارون اتابەكتىڭ اعاسى راشيت نۇتىشيەۆتى ۇيىنەن شىعارماي قويدىڭدار. 17 جەلتوقساندا مەنىڭ قالادا ءجۇرىپ-تۇرۋىمدى شەكتەدىڭدەر. بۇگىن وتە ساۋاتتى بلوگەر ازامات بايكەنوۆتى 10 تاۋلىككە قاماپ قويدىڭدار. ەگەر سەندەر ازامات بايكەنوۆقا دورەكىلىك تانىتاتىن بولساڭدار، ءبىز وندا ەشكىمگە باعىنبايتىنىمىزدى مالىمدەيمىز، – دەدى ول.
بەلسەندىلەر قاماۋداعى ازاماتتاردىڭ جاعدايىن ءبىلۋ ءۇشىن ۇستاۋ مەكەمەسىنە كىرۋگە تىرىسقانىمەن، ولارعا ونداي مۇكىندىك بەرىلگەن جوق. قۇقىق قورعاۋشىلاردىڭ ايتۋىنشا، بەلسەندىلەردىڭ ادۆوكاتى بولماعاندىقتان ولاردى ىشكە كىرگىزبەگەن.
بۇعان دەيىن 16 جەلتوقساندا "رۇقسات ەتىلمەگەن جيىنعا قاتىستى" دەپ ۇستالعان بەلسەندىلەردىڭ بىرنەشەۋى ۋاقىتشا ۇستاۋ مەكەمەسىندە اشتىق جاريالاعانى حابارلانعان ەدى.
16 جەلتوقساندا قازاقستاننىڭ بىرنەشە قالاسىندا 1986 جىلعى جەلتوقسان وقيعاسى مەن 2011 جىلعى جاڭاوزەن وقيعالارىندا قۇربان بولعان ازاماتتاردى ەسكە الىپ، رۋحتارىنا قۇران باعىشتاعان. سول كۇنى تۇستەن كەيىن الماتى مەن نۇر-سۇلتاندا جينالعاندار قالا كوشەلەرىندە "شال، كەت!" دەگەن ۇرانمەن شەرۋلەتتى. پوليسيا شەرۋگە قاتىسقان ازاماتتاردى جاپپاي ۇستادى.
18 جەلتوقساندا قازاقستاننىڭ ىشكى ىستەر مينيسترلىگى تاۋەلسىزدىك كۇنى الماتى مەن نۇر-سۇلتان قالاسىندا رۇقسات ەتىلمەگەن شەرۋ وتكىزبەك بولدى دەگەن كۇدىكپەن 55 ادام ۇستالعانىن مالىمدەدى. ۆەدومستۆو تاراتقان حابارلامادا الماتى قالاسى بويىنشا تاۋەلسىزدىك كۇنى 23 ادام پوليسياعا جەتكىزىلگەنى ايتىلعان.
