قازاقستان پرەزيدەنتى قىسىم-جومارت توقايەۆ "1994 جىلعى 10 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراسياسىنىڭ ۇكىمەتى اراسىنداعى «بايقوڭىر» كەشەنىن جالعا بەرۋ شارتىنا وزگەرىس ەنگىزۋ تۋرالى حاتتامانى راتيفيكاسيالاۋ تۋرالى" قازاقستان رەسپۋبليكاسىنىڭ زاڭىنا قول قويدى. بۇل تۋرالى بۇگىن، 25 جەلتوقساندا اقوردانىڭ رەسمي سايتى حابارلادى. 

اقوردا سايتىنداعى حابارلامادا زاڭ ءماتىنىنىڭ تولىق نۇسقاسى باسپاسوزدە جاريالاناتىنى جازىلعان.

12 جەلتوقساندا قازاقستان سەناتى رەسەي جالعا العان بايقوڭىرداعى 11،6 مىڭ گەكتار جەردى كەرى قايتاراتىن زاڭ قابىلداعان بولاتىن. قۇجاتقا سايكەس، قازاقستان مەن رەسەي اراسىندا 1994 جىلى 10 جەلتوقساندا قول قويعان بايقوڭىر كەشەنىن جالعا الۋ تۋرالى كەلىسىمگە وزگەرىس ەنگىزىلىپ، پرەزيدەنتتىڭ قول قويۋىنا جىبەرىلگەن. 

بايقوڭىر (1996 جىلعا دەيىن لەنينسك قالاسى) — قىزىلوردا وبلىسىنىڭ قارماقشى اۋدانىنداعى قالا. تورەتام تەمىر جول ستانساسىنان باتىسقا قاراي 2 كم جەردە، سىرداريا وزەنىنىڭ وڭ جاعالاۋىندا، تۇران جازىعىنىڭ قۋاڭ بەلدەمىندە ورنالاسقان. بايقوڭىردا 77 مىڭنان استام ادام تۇرادى. رەسەي قازاقستانعا تيەسىلى بايقوڭىردى 1994 جىلدان باستاپ، 2050 جىلعا دەيىن جالعا العان. بايقوڭىر قالاسىنا اكىم رەسەي جانە قازاقستان پرەزيدەنتتەرىنىڭ جارلىعىمەن تاعايىندالادى.