25 جەلتوقساندا قوستاناي قالاسى №2 سوتىندا "تۇلپار-تالگو پويىزىندا جولاۋشىنى زورلادى" دەپ ايىپتالعان ەكى جولسەرىككە ۇكىم شىعارىلدى. سۋديا شىعارعان ۇكىمگە سايكەس، ولاردىڭ ءارقايسىسى بەس جىلعا باس بوستاندىعىنان ايىرىلدى. بۇل تۋرالى Tengrinews.kz سايتى حابارلادى. 

ايىپتالۋشى جەتەس ۇمبەتالييەۆ پەن قولقانات قۇرمانيازوۆ قىلمىستىق كودەكستىڭ 120-بابى ("زورلاۋ") بويىنشا كىنالى دەپ تانىلعان. شىعارىلعان سوت ۇكىمىنە سايكەس، جولسەرىكتەردىڭ جازاسى العاشقى سوتتىڭ ۇكىمى شىققاننان باستاپ، ياعني 26 شىلدەدەن ەسەپتەلەدى. 

شىلدەدە قوستاناي وبلىستىق سوتىنىڭ سۋدياسى ورازباي ساتىبالدى جەتەس ۇمبەتالييەۆ پەن قولقانات قۇرمانيازوۆتى ەكى جارىم جانە ەكى جىل ءۇش ايعا سوتتاعان. ول كەزدە سۋديا شەشىمىنە ايىپتالۋشى تاراپ تا، جابىرلەنۋشى تاراپ تا كەلىسپەي، قوستاناي وبلىستىق سوتىنا اپەلاسيالىق شاعىم تۇسىرگەن ەدى. قوعامدا دا سوت شەشىمىنە نارازىلىق كۇشەيگەندىكتەن، تامىزدا قوستاناي وبلىستىق سوتى ۇكىمدى جويىپ، ءىستى قايتا تەرگەۋگە جىبەرگەن.

بۇل وقيعا 2018 جىلى 26 قىركۇيەكتە بولعان. تەرگەۋ ورىندارىنىڭ قۇجاتىنا سايكەس، نۇر-سۇلتاننان اقتوبەگە بارۋ ءۇشىن "تۇلپار-تالگو" پويىزىنا مىنگەن جولاۋشىنى تۇندە كۋپەگە ءوز كىلتتەرىمەن كىرگەن جولسەرىكتەر زورلاعان. كەيىن جابىرلەنۋشى "نەمولچيKZ" قوعامدىق قورىنان كومەك سۇراعان. قور جەتەكشىسى دينا سمايلوۆا بۇل وقيعا جايلى ءوزىنىڭ Facebook-تااعى پاراقشاسىنا جاريالاعاننان كەيىن قوعامدا شۋ تۋا باستادى.