سىبايلاس جەمقورلىققا  قارسى ءىس-قيمىل اگەنتتىگىنىڭ تۇركىستان وبلىسى بويىنشا  دەپارتامەنتىنىڭ باستاماسىمەن قۇرىلعان «مەيىرىمدىلىك نۇرى» اكسياسى شەڭبەرىندە ارىس قالاسىنداعى «ت.تاجىبايەۆ اتىنداعى وتباسى ۇلگىسىندەگى بالالار اۋىلىنىڭ»  جاسوسپىرىمدەرىمەن  «قوش كەلدىڭ، جاڭا جىل!» مەرەكەلىك شاراسى اتاپ ءوتىلدى. 

  مەرەكەلىك شارانىڭ نەگىزگى ماقساتى – بالالاردى شاتتىق شۋاعىنا بولەپ، كوتەرىڭكى-كۇيگە كەنەلتۋ جانە  ايرىقشا كوڭىل ءبولۋ ارقىلى ولاردىڭ ومىرگە دەگەن ىنتا-جىگەرىن ارتتىرۋ.

 ىزگىلىككە  تولى مەرەكەلىك شارادا سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىنىڭ باسشىسى حاكيم كوشقالييەۆ  ءسوز الىپ، بالالار اۋىلىنىڭ تاربيەلەنۋشىلەرىنە جۇرەكجاردى ىستىق لەبىزىن ءبىلدىردى.    

جاڭا جىلدىق شىرشانىڭ شامى جاعىلعان كوڭىلدى كەشتە تالانتتى  بالالار ۇزدىك ساحنالىق قويىلىمدارىن  قويىپ،   مازمۇنعا تولى جىر-دەستەلەرىن وقىدى. بۇلبۇل داۋىستى بۇلدىرشىندەر  اۋەلەتە  ءان سالىپ، قىرمىزى قىزدار مىڭ بۇرالا بي بيلەدى.   

بالالاردىڭ شات كۇلكىسىنە بولەنگەن كەشتە ارىس قالاسىنىڭ اكىمى  مۇرات بولات ۇلى اتالعان بالالار اۋىلىنىڭ ديرەكتورى مەرۋەرت سۇيندىكوۆاعا ايرىقشا  العىس ايتىپ، تاربيەلەنۋشىلەردىڭ جاڭا جىلدا جارقىن جەتىستىكتەرگە جەتە بەرۋلەرىنە تىلەكتەستىك  ءبىلدىردى. 

         شاتتىققا تولى شارا بارىسىندا شات-شادىمان كۇي كەشكەن بالاقايلار  وسكەمەن قالاسىندا ورنالاسقان «ءۇمىت» بالالار ءۇيىنىڭ تاربيەلەنۋشىلەرىمەن تەلەكران ارقىلى تىكەلەي بايلانىسقا شىعىپ، ايتۋلى مەرەكەمەن قۇتتىقتاۋعا جانە  اقجولتاي تىلەكتەرى مەن ىستىق ىقىلاستارىن بىلدىرۋگە مۇمكىندىك الدى. سونداي-اق، «ءۇمىت» بالالار ءۇيىنىڭ تۇلەكتەرى مەرەكەلىك شاراعا ارنايى قوناق بولىپ، بۇلدىرشىندەرگە ارنايى جاڭا جىلدىق   توسىنسىيىن تارتۋ ەتتى. 

بەزەندىرىلگەن بيىك شىرشانى اينالا بيلەگەن بالعىندار اياز اتا قورجىنىنان ءدام تاتىپ، ەستە قالار عاجايىپ ءساتتىڭ كۋاسى بولدى.

ايتا كەتسەك، قىركۇيەك ايىنان باستاپ 62-جەتكىنشەكتى  ءوز قامقورلىعىنا العان دەپارتامەنت قىزمەتكەرلەرى قوعامنىڭ قۇندى بولشەگى – بالالارعا  ءتاتتى سىيلىقتارىن ۇلەستىرىپ، ولاردى اركەز قولداۋعا  دايىن ەكەندىكتەرىن جەتكىزدى.