بۇگىن، 22 قاڭتاردا قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ جيەن نەمەرەسى، قازاقستان پارلامەنتى سەناتىنىڭ قازىرگى سپيكەرى داريعا نازاربايەۆانىڭ ۇلى ايسۇلتان راحات Facebook-تاعى پاراقشاسىندا بىرنەشە پوست جازدى. نازاربايەۆتىڭ نەمەرە جيەنىنىڭ جازعاندارى ءقازىر جەلىدە قىزۋ تالقىلانىپ جاتىر. 

ايسۇلتان راحات بۇگىنگى جازعان پوستارىنىڭ بىرىندە نۇرسۇلتان نازاربايەۆتىڭ ۇلى ەكەنىن جازدى. 

"مەنىڭ انام اتامدى مەن ونىڭ بالاسى بولعاندىقتان، قارماقتا ۇستادى" دەپ جازدى ايسۇلتان راحات. 

بۇل اقپاراتتىڭ راس يا جالعان ەكەنىن ءبىلۋ ماقساتىندا ايسۇلتان راحات فەيسبۋك پاراقشاسىندا كورسەتكەن تەلەفون نومەرگە حابارلاستىق، ءبىراق بايلانىسا المادىق. دەگەنمەن Holanews.kz سايتىنىڭ جۋرناليستەرى ايسۇلتان راحاتپەن سويلەسىپ، سۇحبات العاندارىن جازدى. سول سۇحباتتا ايسۇلتان راحات فەيسبۋكتاعى بارلىق جازبانى ءوزى جازعانىن راستاعان. جانە "كوپ جىلدان بەرى ءبىزدىڭ وتباسىمىزدا كوپتەگەن جاعدايلار بولدى جانە ول بۇكىل مەملەكەتكە اسەرىن تيگىزدى" دەپ ايتقان. 

وتكەن جىلى قازاننىڭ 18ء-ى كۇنى لوندون سوتى ايسۇلتان راحاتقا ءبىر جىل شارتتى جازا كەستى. برتانيالىق باق-تاردىڭ جازۋىنشا، ول 2019 جىلى ماۋسىم ايىندا بريتان پوليسياسىنا قارسىلىق كورسەتكەنى ءۇشىن جاۋاپقا تارتىلعان. نازاربايەۆتار وتباسى ايسۇلتان راحاتتىڭ ۇلىبريتانيادا ۇستالعانى جانە سوتتالعانى جايلى ەشقانداي مالىمدەمە جاساعان جوق.

1990 جىلى 26 تامىزدا ومىرگە كەلگەن ايسۇلتان نازاربايەۆ – قازاقستاندى 30 جىلعا جۋىق ۇزدىكسىز بيلەپ، 2019 جىلى ناۋرىزدا ءوز ەركىمەن پرەزيدەنتتىك قىزمەتتەن كەتكەن (ءبىراق ەلدەگى بيلىكتىڭ ءبىر تارماعىن ۇستاپ وتىرعان)  نۇرسۇلتان نازاربايەۆتىڭ ۇلكەن قىزى داريعا نازاربايەۆا مەن اۆستريا تۇرمەلەرىنىڭ بىرىندە كوز جۇمعان قازاقستاندىق شەنەۋنىك راحات الييەۆتىڭ ۇلى.

قازاقستاندىق اقپارات قۇرالدارىنىڭ جازۋىنشا، ايسۇلتان راحات بالا كەزدەن فۋتبولعا قىزىققان. 2006 جىلى قازاقستاننىڭ جاسوسپىرىمدەر قۇراماسىنىڭ ساپىندا ەۋروپا چەمپيوناتىنىڭ ىرىكتەۋ تۋرنيرىنە قاتىسقان. "چەلسي" جانە "پورتسمۋت" جاستار كوماندالارى مەن قازاقستاندىق "استانا" كومانداسىندا ويناعان.

ول ۇلىبريتانيا كورولدىگىنىڭ "ساندحەرست" اسكەري اكادەمياسىنىڭ ءتامامداعان. ايسۇلتان وقۋىن ءبىتىرىپ، قازاقستانعا ورالعان سوڭ ەلدىڭ قورعانىس مينيسترلىگىنىڭ بارلاۋ باسقارماسىندا قىزمەت ەتتى. 2017 جىلى 7 ايداي قازاقستان فۋتبول فەدەراسياسىنىڭ ۆيسە-پرەزيدەنتى قىزمەتىن اتقاردى. 

ايسۇلتان راحات 2013 جىلى "قازرومگاز" اق باسشىسى، الماتىلىق "قايرات" فۋتبول كلۋبىنىڭ قوجايىنى قايرات بورانبايەۆتىڭ قىزى اليما بورانبايەۆعا ۇيلەندى. 2016 جىلدىڭ جازىندا ولاردىڭ امەلي ەسىمدى قىز دۇنيەگە كەلدى.