نۇرسۇلتان تولەن ۇلى ۇزدىك 300 جاستىڭ قاتارىندا مەملەكەت باسشىسىمەن كەزدەسۋدە بولىپ، پرەزيدەنتتىك جاستار رەزەرۆىنە الىنعان دەپ جازادى Qamshy.kz اقپارات اگەنتتىگى. بۇل تۋرالى ق ر جوعارى سوتىنىڭ باسپا ءسوز قىزمەتىنىڭ وكىلى ايدوس سادۋاقاسوۆ حابارلادى. 

"بۇگىن سىزدەرگە تاعى ءبىر قۋانىشتى جاڭالىقتى حابارلاعالى وتىرمىن.
قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمىنە جانە جوعارعى سوت ءتوراعاسىنىڭ وكىمىنە سايكەس نۇرسۇلتان تولەن ۇلى بايتىلەسوۆ جوعارعى سوت اپپاراتى باسشىسىنىڭ ورىنباسارى بولىپ تاعايىندالدى.

ن.بايتىلەسوۆ 1991 جىلى تۋعان. م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا، وڭىرلىك الەۋمەتتىك-يننوۆاسيالىق ۋنيۆەرسيتەتىن «ەكونوميكا جانە بيزنەس» ماماندىعى بويىنشا بىتىرگەن. زاڭ عىلىمدارىنىڭ ماگيسترى.

2009 جىلدان باستاپ استانا قالاسى الماتى اۋداندىق سوتىنىڭ جەتەكشى مامانى، باس مامان-سوت وتىرىسىنىڭ حاتشىسى، سوت پريستاۆى، باس مامانى، اتىراۋ، پاۆلودار وبلىستىق سوتتارىنىڭ كەڭسەسى باسشىسىنىڭ ورىنباسارى، جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باس كونسۋلتانتى بولىپ قىزمەت اتقارعان.
2016 جىلدان باستاپ 2018 جىلعا دەيىن – اسكەري سوت اكىمشىسىنىڭ باسشىسى، ق ر جوعارعى سوتى جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ حالىقارالىق بايلانىستار جانە پروتوكول ءبولىمى مەڭگەرۋشىسىنىڭ ورىنباسارى.

وسى تاعايىنداۋعا دەيىن شىمكەنت قالاسىنىڭ سوتتار اكىمشىسىنىڭ باسشىسى بولدى.

مەملەكەتتىك قىزمەتتىڭ بارلىق ساتىسىنان ءوتىپ، ناتيجەسىندە جوعارعى سوت اپپاراتىنىڭ باسشىلىعىنا كەلگەن ارىپتەسىمىز نۇرسۇلتان تولەنۇلىنا وسى قىزمەتتە ابىروي مەن ساتتىلىك تىلەيمىز! بويىنداعى بار ءبىلىمى مەن تاجىريبەسىن سوت جۇيەسىن ودان ءارى دامىتۋعا جۇمسايدى دەپ سەنەمىز!"، - دەپ جازدى ايدوس سادۋاقاسوۆ.