23-24 قاڭتار كۇندەرى ءوزىنىڭ facebook-تەگى پاراقشاسىندا كوپتەگەن داۋلى جازبالار قالدىرعاننان كەيىن ءۇنسىز كەتكەن ايسۇلتان راحات الەۋمەتتىك جەلىدەگى پاراقشاسىنا جاڭا جازبا جاريالادى.
ول تۇككە تۇرعىسىز ومىرىندە ەشكىمگە پايداسى تيمەگەنىنە قاراماستان وزىنە قولداۋ بىلدىرگەندەرگە العىسىن ايتتى.
"وسى كۇنگە دەيىن قۇدايدىڭ ارقاسىندا ءتىرى ءجۇرمىن" دەگەن ول ءوزىنىڭ قايدا ەكەنىن ءمالىم ەتتى.
"ءقازىر مەن الدىڭعى جازبالارىمدى جازعان جەردەمىن. بۇل سىزدەردىڭ قولداۋلارىڭىزدىڭ ارقاسى. مەن 2016 جىلدان بەرى وتباسىم مەن وتباسىما جاقىن ادامداردان قىسىم كورىپ كەلەم. مەنىڭ تاعدىرعا وكپەم جوق. ونىڭ مەنى بۇلايشا سىناپ جاتقانىنان العىس ايتام. ويتكەنى مەن ونى (قۇدايدى - رەد) تاپتىم. مەن 14 اي بويى رەسەيلىك تۇرمەدە زاڭسىز وتىرعاندا دا، لوندونداعى پوليسيا ۋچاسكەسىندە بولعاندا دا ول (قۇداي - رەد) مەنىڭ جۇرەگىمدە بولدى. مەن جاقىندا باسىمنان وتكەننىڭ ءبارىن تىپتىشتەپ ايتىپ بەرەم. مەن ۇنەمى شىندىقتى ايتاتىنىمدى سىزدەر بىلەسىزدەر. بۇگىنگى شىندىق وتە مۇڭلى." دەدى ول.
ونىڭ ايتۋىنشا، وتباسىنا جاقىن ادامدار مەن ولاردىڭ جەكسۇرىندارى ەل قازىناسىن مەملەكەتتىك تەندەر ارقىلى ساۋۋىن جالعاستىرادى. وعان بەلگىلى ءبىر دارەجەدە قولدا بار مۇمكىندىكتى پايدالانىپ وزگەرىس جاساماعانى ءۇشىن ءوزى دە، ماي قىزمەتكەرلەرىنە پارا بەرۋ ارقىلى جەمقورلىقتىڭ جايىلۋىنا سەبەپ بولعان ءار ازامات تا كىنالى. ال ناعىز ۇياتسىزدار جوعارىدا وتىر.
ايسۇلتاننىڭ جازۋىنشا، قاندايدا ءبىر ورىنعا وتىرۋ ويى جوق.
"مەن مەملەكەتتىك بىلىقتىڭ بولشەگى بولعىم كەلمەيدى. ال بولشەگى بولىپ جاتسام، وندا جۇيەنى تالقانداۋ ءۇشىن عانا بولار ەدىم. جۇيەنى سىندىرۋ ءتىپتى مەنىڭ بيولوگيالىق اكەمنىڭ دە قولىنان كەلمەدى. ول ونى قاتتى قالادى. الايدا ونىڭ اينالاسىنداعى كەڭەس وداعىندا تاربيەلەنگەندەر، ولاردىڭ ويلاۋ قابىلەتىنىڭ شەكتەۋلى بولۋى، وزگەرىستەن قورقۋى مۇمكىندىك بەرمەدى" دەپ اتاپ ءوتتى ايسۇلتان راحات.
ول ادامداردا مورالدىق قاعيدالاردىڭ قالماعانىن جازدى.
"الدىمەن نازاربايەۆتىڭ كۇيەۋ بالاسىن توپەلەدى. ەندى ونىڭ تۋعان قانىنا دا سوندايدى ىستەمەك. تىم كوپ بىلگەنى ءۇشىن. مۇندايدا شىندىقتى ايتقىسى كەلگەن قاراپايىم ازاماتتىڭ جاعدايى قانداي بولاتىنىن ايتۋدىڭ ءوزى قيىن. الايدا شىعار امال ءارقاشان دا تابىلادى" دەگەن ول ارى قاراي ءدىن جايلى ويلارىمەن بولىسكەن.
پىكىر قالدىرۋ