بۇگىن، 2 اقپاندا قازاقستان بيلىگى كورونوۆيرۋس تارالعان قىتايدىڭ ۋحان قالاسىنان ەلدىڭ 83 ازاماتىن ەۆاكۋسيالادى. بۇل تۋرالى ۇكىمەتتىڭ باسپا ءسوز قىزمەتى حابارلادى.
ۇكىمەتتىڭ رەسمي سايتىندا جاريالانعان حابارلامادا ەۆاكۋسيالانعان 83 ازاماتتىڭ 80ء-ى ستۋدەنت ەكەنى ايتىلعان.
"ۇشۋ بارىسىندا ءبىزدىڭ ازاماتتارىمىزدى بارلىق قورعاۋ قۇرالدارىمەن قامتاماسىز ەتىلگەن قازاقستاندىق دارىگەرلەر سۇيەمەلدەدى. دەنساۋلىق جاعدايى تەكسەرىلگەننەن كەيىن ەلگە ورالعان ازاماتتار قالادان 7 شاقىرىم جەردە ورنالاسقان ەلوردانىڭ كوپبەيىندى اۋرۋحاناسى جانىنداعى ينفەكسياعا قارسى ارنايى بولىنگەن كورپۋستا 14 كۇندىك كارانتينگە جاتقىزىلدى. كلينيكا ينفەكسيالىق قاۋىپسىزدىكتىڭ قاجەتتى تەحنولوگيالارىمەن، زاماناۋي دياگنوستيكالىق، ەمدىك جانە رەانيماسيالىق قۇرالدارمەن جابدىقتالعان، ءتيىستى مەديسينالىق قىزمەتكەرلەرى بار. مەديسينالىق مەكەمەدە ەۆاكۋاسيالانعان ازاماتتار قوسىمشا تەكسەرۋدەن، ءبىرىنشى كەزەكتە، كوروناۆيرۋستىق ينفەكسياعا تەستىلەۋدەن وتەدى. كارانتين كەزەڭى كەزىندە ەلگە كەلگەن ادامدارمەن تەك اسا ءقاۋىپتى ينفەكسيالارمەن جۇمىس ىستەۋ تاجىريبەسى بار مەديسينالىق پەرسونال عانا بايلانىستا بولادى. ەلگە جەتكىزىلگەن ازاماتتاردىڭ تۋعان-تۋىستارى مەن جاقىندارى حاباردار ەتىلدى جانە ولار كارانتيندىك كەزەڭنىڭ رەگلامەنتىمەن تانىستىرىلدى" دەلىنگەن ۇكىمەت حابارلاماسىندا.
ۇكىمەت باسپا ءسوز قىزمەتىنىڭ اقپاراتىنا قارعاندا، قىرعىزستان، بەلارۋسيا، ارمەنيا مەملەكەتتەرىنىڭ ازاماتتارى دا ۋحان قالاسىنان ەۆاكۋسيالاعان.
"مەملەكەت باسشىسىنىڭ تاپسىرماسى بويىنشا قحر-عا 13،6 توننا كولەمىندە مەديسينالىق بۇيىمدار تۇرىندە گۋمانيتارلىق كومەك جەتكىزىلدى. قىرعىزستان رەسپۋبليكاسى، بەلارۋس رەسپۋبليكاسى جانە ارمەنيا رەسپۋبليكاسى بيلىكتەرىنىڭ ءوتىنىشى بويىنشا وسى ەلدەردىڭ دە ازاماتتارى قحر ۋحان قالاسىنان ەۆاكۋاسيالاندى.بارلىق قاجەتتى اقپاراتتى ۇسىنۋ ءۇشىن تاۋلىك بويى 1406 سall-ورتالىعى جۇمىس ىستەيدى.ازاماتتاردى جالعان اقپاراتتى تاراتپاۋعا، اقپاراتتاردى رەسمي دەرەك كوزدەرىنەن الىپ، سەنۋگە شاقىرامىز" دەلىنگەن ۇكىمەت تاراتقان حابارلامادا.
پىكىر قالدىرۋ