قالا اكىمىنىڭ ورىنباسارى ەرجان باباقۇماروۆ ءتوراعالىق ەتەتىن كوروناۆيرۋستىق ينفەكسيانىڭ تارالۋىنىڭ الدىن الۋ جونىندەگى وڭىرلىك شتاب الماتىنىڭ حالىقارالىق اۋەجايىنا كەلەتىن بارلىق حالىقارالىق رەيستەرگە، اسىرەسە ءقاۋىپتى ايماقتاردان كەلۋشىلەرگە جۇرگىزىلەتىن كۇشەيتىلگەن سانيتارلىق-كارانتيندىك باقىلاۋ جۇمىستارىن تەكسەردى.
باقىلاۋ بارىسىندا قازاقستان رەسپۋبليكاسىنىڭ باس مەملەكەتتىك سانيتارلىق دارىگەرى جانداربەك بەكشيننىڭ ۇسىنىستارىنىڭ ساقتالۋى تەكسەرىلدى. سونىمەن قاتار، كوشى-قون پوليسياسى، اۋەجاي قىزمەتكەرلەرى جانە كەلۋشىلەرمەن قارىم-قاتىناستا بولاتىن وزگە دە ادامداردىڭ بەتپەردە تاعۋ رەجيمى قانشالىقتى قولدانىلاتىنىنا تالداۋ جۇرگىزىلدى.
سونداي-اق زالالسىزداندىرۋ ەرىتىندىلەرىن قولدانۋ جانە قاجەتتى مولشەرمەن قامتۋ ماسەلەلەرى، قوعامدىق قولدانىستاعى ورىنداردىڭ سانيتارلىق جاعدايى باقىلاندى. ەلدىك ۇيلەستىرۋ كوميتەتىنىڭ قىزمەتكەرلەرىن جەكە قورعانۋ قۇرالدارىمەن قامتاماسىز ەتۋ ماسەلەلەرى قارالدى.
اۋەجاي اۋماعىندا ورنالاسقان قوعامدىق تاماقتانۋ ورىندارى جانە ساۋدا نىساندارىنىڭ قىزمەتىنە سانيتارلىق-كارانتيندىك باقىلاۋ ماقساتىندا تەكسەرۋ جۇرگىزىلدى. باس مەملەكەتتىك سانيتارلىق دارىگەردىڭ قاۋلىسىن ورىنداۋ ءۇشىن مونيتورينگ بارىسىندا انىقتالعان زاڭ بۇزۋشىلىقتار بويىنشا ورىنداۋ مەرزىمى كورسەتىلگەن قاۋلىلار مەن ەسكەرتۋ حاتتار ازىرلەنىپ، بەرىلدى.
وتىرىس قورىتىندىسى بويىنشا وڭىرلىك شتاب كوروناۆيرۋستىڭ تارالۋىنا جول بەرمەۋ ءىس-شارالارىنىڭ وتكىزىلۋى بارىسىنا مونيتورينگتى كۇن سايىن ءارى تۇراقتى نەگىزدە جۇزەگە اسىرۋ تۋرالى شەشىم قابىلدادى.
جالپى بۇگىنگى كۇنى مەگوپوليستە جاعداي باقىلاۋدا، كوروناۆيرۋستىق ينفەكسيا جاعدايى تىركەلگەن جوق. بيولوگيالىق قاۋىپسىزدىك جونىندەگى بارلىق ارنايى ۆەدومستۆولار جانە سانيتارلىق كۇزەت قىزمەتكەرلەرى دايىندىقتان وتكەن. توتەنشە جاعدايدىڭ ءتۇرلى دەڭگەيىندەگى سانيتارلىق-كارانتيندىك باقىلاۋ ەرەجەلەرىن ۇستانادى.
پىكىر قالدىرۋ