Facebook الەۋمەتتىك جەلىسىندە قازاقستانداعى دۇنگەن قاۋىمداستىعىنىڭ باسشىسى حۋسەي داۋروۆتىڭ "جۇڭگو بيلىگىنەن كومەك سۇراپ جازعانى" دەلىنگەن حات پەن ونىڭ قازاقشاعا ءتارجىمالانعان نۇسقاسى تاراۋدا. وندا قىتايداعى دەرتتىڭ سالدارىنا قالىپتاسقان اۋىر جاعدايعا قاراماستان كومەك سۇراۋعا ءماجبۇر بولعانى، قارجىلاي كومەك كۇتەتىنى جازىلعان.
"اسا ءقادىرلى، سۇيىكتى دوستار، اعا-باۋىر، اپكە-قارىنداستار، بارشا باۋىرلاستار!
جۇڭگو ەلى اپاتتى باستان كەشىرىپ جاتقان كەزدە، ون مىڭداعان ادام قورقىنىشتى اۋرۋدى جۇقتىرىپ، مىڭداعان ادام ولگەن شاقتا ءبىزدىڭ قازاقستاندا دا قايعىلى وقيعا ورىن الدى.
ءبىزدىڭ ءبىراز اۋىلدارىمىز توناۋشىلىققا، قاندى قىرعىنعا ۇشىرادى. سونىڭ كەسىرىنەن 11 ادام ءولىپ، 100-دەن اسا ادام جارالاندى. ۇيلەر مەن ساۋدا ورتالىعى، كولىكتەر ورتەندى. كىشىگىرىم جانجالدىڭ ارتى الدەبىر ارانداتۋشىلار مەن قازاقستاننىڭ بەيبىت دامۋىن كورە المايتىنداردىڭ الەۋمەتتىك جەلى مەن whatsapp ارقىلى قوزدىرۋىنىڭ سالدارىنان توناۋشىلىق پەن قىرعىنعا ۇلاستى. نەگىزى جانجالداسۋشىلار سول كۇنى-اق ىمىراعا كەلگەن بولاتىن.
قىتايدىڭ ۆيرۋسپەن كۇرەسىپ جاتقان كەزىندە ءبىزدىڭ بۇلايشا قارجىلىق كومەك سۇراعىمىز كەلمەگەن. ءبىراق ءبىز دە قىتايعا گۋمانيتارلىق كومەك جىبەردىك. قىتايداعى جانە ول جاقتان كەلگەن دوستارىمىزدىڭ ءبىزدىڭ تاعدىرىمىزعا تىلەكتەستىك ءبىلدىرىپ، كومەك بەرۋدى تالاپ ەتىپ وتىرۋى سەبەپتى دۇنگەن قاۋىمداستىعى ءۇشىن اشىلعان شوتقا قارجىلاي كومەك بەرۋلەرىڭىزدى سۇرايمىز" دەلىنگەن جازبادا.
قوردايداعى جانجالدان كەيىن دۇنگەن قاۋىمداستىعىنىڭ باسشىسى حۋسەي داۋروۆتىڭ الەۋمەتتىك جەلىدەگى پاراقشالارىنا قىزىعۋشىلىق ارتا تۇسكەن. ونىڭ جازبالارى قوعامدا ءتۇرلى رەاكسيا تۋدىرىپ، قىزۋ تالقىلانۋدا. قوردايداعى جانجالعا دەيىن داۋروۆ facebook پاراقشاسىندا جۇڭگو بيلىگىنىڭ ارەكەتتەرى، قحر ءتوراعاسى سي ءسزينپيننىڭ كەزدەسۋلەرى، جاساعان ساپارلارى، جۇڭگو ۇكىمەتىنىڭ كوروناۆيرۋسپەن كۇرەس بارىسى، جۇڭگو قوعامىنداعى وقيعالار تۋرالى جاڭالىقتارمەن ءجيى ءبولىسىپ وتىرعان. كەيبىر الەۋمەتتىك جەلى قولدانۋشىلارى ونىڭ بۇل ارەكەتىن "قىتايشىل" ادام ءىسى دەپ ايتىپتاعان.
پىكىر قالدىرۋ