"دەمپارتيا" قۇرۋعا ىنتالى باستاماشىل توپ جاقتاستارى الماتى وبلىسى قاراساي اۋدانى ىشكى ىستەر ءبولىمى عيماراتىنىڭ الدىنا جينالىپ جاتىر. ولار باستاماشىل توپ جەتەكشىسى جانبولات مامايدى بوساتۋدى تالاپ ەتۋدە.
پوليسيا قىزمەتكەرلەرى جينالعان جۇرتتى، سونداي-اق مامايدىڭ ادۆوكاتىن ىشكى ىستەر بولىمىنە كىرگىزبەي تۇر.
ماماي جاقتاستارىنىڭ ءبىرى پرەزيدەنت توقايەۆقا ۇندەۋ جاساپ، "ساياسي رەفورمالار جاسالادى دەپ ەدىڭىز عوي. ەندى مىناداي ارەكەتتى قالاي تۇسىنسە بولادى؟ مەنىڭە، ءسىزدىڭ ابىرويىڭىزعا نۇقسان كەلتىرۋ ءۇشىن الدەكىمدەر ازاماتتاردىڭ پىكىرىن اشىق ايتۋ قۇقىعىن پايدالانۋعا، پارتيا قۇرۋ قۇقىعىن پايدالانۋعا قاساقانا كەدەرگى كەلتىرىپ وتىر. وسىعان بايلانىستى ەل الدىنا شىعىپ، تۇسىنىك بەرۋىڭىزدى سۇرايمىز" دەدى.
اۋداندىق ىشكى ىستەر بولىمىنە جينالعان ازاماتتاردىڭ اراسىندا مامايدى بوساتۋىن تالاپ ەتىپ، توتەنشە شارا رەتىندە اشتىق جاريالاۋدى ۇسىندى. ۇسىنىستى ون شاقتى ازامات قولدايتىنىن ايتتى.
دەمپارتيا باستاماشىل توبىنىڭ جەتەكشىسى جانبولات مامايدى بوساتۋىن تالاپ ەتىپ، اشتىق جاريالاعان ازاماتتار
قاسكەلەڭدەگى ىشكى ىستەر بولىمىنە جينالىپ جاتقان دەمپارتيا جاقتاستارى ءسات-سايىن كوبەيىپ جاتىر.
پوليسيا قىزمەتكەرلەرى جۋرناليستەرگە جانە مامايدىڭ جاقتاستارىنا ونىڭ نە سەبەپتى ۇستالعانىنا قاتىستى پىكىر بىلدىرگەن جوق.
مامايدىڭ ايەلى، جۋرناليست ينگا يمانبايدىڭ ايتۋىنشا، پوليسيا بەلسەندىنى باستاماشىل توپتىڭ وكىلى جانبول راحماتۋللانىڭ قاسكەلەڭ قالاسىنداعى قاراساي اۋداندىق سوتىنا كەلگەن كەزدە ۇستاپ، شاقىرتۋ قاعازىن كورسەتپەستەن اۋداندىق پوليسيا باسقارماسىنا كۇشتەپ الىپ كەتكەن.
پىكىر قالدىرۋ