21 اقپان كۇنى كەشكە "ميتينگىگە شاقىردى" دەگەن ايىپپەن ءۇش تاۋلىككە قامالعان دەموكراتيالىق پارتيا باستاماشىل توبىنىڭ جەتەكشىسى، وپپوزيسيالىق ساياساتكەر جانبولات ماماي ەكى تاۋلىكتەن كەيىن بوساپ شىقتى. بۇل تۋرالى مامايدىڭ ءوزى Facebook پاراقشاسىندا حابارلادى.
مامايدىڭ جازۋىنشا، قاراساي اۋدانىنىڭ پروكۋرورى ونىڭ كىشكەنتاي بالالارى بار ەكەنىن ەسكەرىپ، الماتى وبلىسىنىڭ سوتىنان جازاسىن ءۇش تاۋلىكتەن ەكى تاۋلىككە ازايتۋدى سۇراعان.
"بۇگىن كەشكە كۇتپەگەن جەردەن جانە مەنىڭ جاقىندارىما حابارلاماساتان تاعى ءبىر سوت وتىرىسى بولدى. مەنى سوتقا جەتكىزدى جانە سوت وتىرىسى ۆيدەو بايلانىس ارقىلى ءوتتى. الماتى وبلىستىق سوتى جازامدى ەكى كۇنگە وزگەرتتى. مەنى ءقازىر عانا قاراساي اۋداندىق ىشكى ىستەر ءبولىمىنىڭ باسشىلىعى ۇيىمە اكەلىپ تاستادى. مۇمكىن ەرتەڭ بولاتىن قولداۋدان قورىققان شىعار" دەپ جازدى ماماي.
ءۇش كۇن بۇرىن، 20 اقپاندا جانبولات ماماي ازاماتتاردى 22 اقپان كۇنى ساعات 11.00-دە "استانا" الاڭىنا ميتينگىگە كەلۋگە شاقىرعان. سونىڭ ەرتەسىندە، 21 اقپان كۇنى كەشكە قاراي مامايدى قاسكەلەڭ قالاسىندا پوليسيا ۇستاپ، قاراساي اۋداندىق ىشكى ىستەر بولىمىنە جەتكىزدى. ونىڭ ۇستالعانىنا نارازى بولعان جاقتاستارى 21 اقپان كەشكى 23.00-دەن باستاپ قاراساي اۋداندىق ىشكى ىستەر ءبولىمنىڭ الدىندا اشتىق جاريالاپ، بيلىكتەن ونى بوستۋدى تالاپ ەتتى. ال 22 اقپان كۇنى تاڭعى بەستە مامايدىڭ "ميتينگىگە شاقىردى" دەگەن ايىپپەن ءۇش تاۋلىككە قامالعانى بەلگىلى بولدى.
31 جاستاعى جانبولات ماماي قازاقستاندا وپپوزيالىق بەلسەندى، تاۋەلسىز جۋرناليست رەتىندە تانىمال. ول 2017 جىلى "مۇحتار ءابليازوۆتىڭ قارجىسىن گازەت ارقىلى زاڭداستىرماق بولدى" دەگەن ايىپپەن ءۇش جىل مەرزىمگە شارتتى جازاعا كەسىلىپ، سوت ونىڭ ءۇش جىل جۋرناليستىك قىزمەتپەن اينالىسۋىنا تىيىم سالعان ەدى. ماماي ءقازىر پروباسيالىق باقىلاۋدا.
وتكەن جىلدىڭ قازان ايىندا ماماي باستاعان ءبىر توپ بەلسەندى بيلىككە وپپوزياسيا رەتىندە "دەموكراتيالىق پارتيا" قۇراتىندارىن مالىمدەگەن. 2019 جىلى 26 جەلتوقساندا ادىلەت مينيسترلىگى باستاماشىل توپتى تىركەگەن. كەيىن ماماي 22 اقپاندا الماتىدا "دەمپارتيانىڭ" قۇرىلتايىن وتكىزەتىنىن حابارلاعان.
ال وسى جىلى 19 اقپاندا "دەمپارتيانىڭ" باستاماشىل توبى الماتىدا باسپا ءسوز ءماسليحاتىن وتكىزىپ، پارتيا جاقتاستارىنا قىسىم جاسالىپ جاتقاندىقتان 22 اقپانعا جوسپارلانعان قۇرىلتاي وتپەيتىنىن، ونىڭ ورنىنا "ميتينگىگە شىعاتىندارىن" مالىمدەگەن بولاتىن.
پىكىر قالدىرۋ