ىشكى ىستەر مينيترلىگى بەلسەندى دۋلات ءاعادىلدىڭ ولىمىنە قاتىستى بۇگىن ساعات 17.00-دە نۇر-سۇلتان قالاسىندا بريفينگ وتكىزىپ رەسمي مالىمدەمە جاسادى. 

ىشكى ىستەر ءمينيسترىنىڭ ورىنباسارى ارىستانعالي زاپپاروۆتىڭ ايتۋىنشا، دۋلات ءاعادىل پوليسيا قىزمەتكەرلەرى ۇيىنەن الىپ كەتەتىن كەزدە ماس كۇيىندە بولعان.  

– 24 اقپاندا كەشكى ساعات 21 شاماسىندا اقمولا وبلىسى سەلينوگراد اۋداندىق پوليسيا ءبولىمىنىڭ قىزمەتكەرلەرى سوت قاۋلىسىن ورىنداۋ ماقساتىندا تالاپكەر ەلدى مەكەنىندە تۇراتىن 1977 جىلى تۋعان دۋلات ءاعادىلدى اقمول اۋىلىنىڭ ەمحاناسىنا جەتكىزگەن. سول جەردە ءتارتىپ بويىنشا ساراپتاما وتكىزىلدى.ساراپتاما ناتيجەسى ازامات ءاعادىلدىڭ قان قۇرامىندا الكوگول بار ەكەنىن انىقتادى. دەنە جاراقاتىنىڭ بار-جوقتىعىنا كوز جەتكىزۋ ءۇشىن نۇر-سۇلتان قالاسى سوت ساراپتاماسىنا جەتكىزىلدى. جاراقاتى جوق دەگەن قورىتىندى شىقتى. تۇنگى 12-گە تامان قىلمىستىق اتقارۋ جۇيەسىنىڭ 166-1 مەكەمەسىنە جەتكىزىلدى. كامەراعا جابار الدىندا دەنساۋلىعىنا بايلانىستى ەشقانداي ارىز-شاعىم تۇسپەگەن. كامەرادا ودان باسقا ءتورت ادام بولدى. تاڭعى ساعات 6-دا تاماعىن ىشكەن. 7-دە دارەتحاناعا كەتەدى. ودان شىعىسىمەن تىزەرلەپ وتىرىپ، ەسىنەن تانىپ قۇلاپ قالعان. كامەراداعىلار ءاعادىلدىڭ دەنساۋلىعىنىڭ ناشارلاعانى تۋرالى باقىلاۋشىعا حابارلايدى. ول العاشقى مەديسينالىق جاردەم شاقىرادى. كەلگەن جەدەل جاردەم ءاقادىلدىڭ كوز جۇمعانىن تىركەيدى. تەكسەرگەن كەزدە دەنەسىنەن زورلىق-زومبىلىق بەلگىلەرى انىقتالمادى. بۇگىندە وعان جۇرەك قان-تامىرلارىنىڭ جەتىسپەۋشىلىگى دياگنوزى قويىلىپ وتىر. بەينەكامەرا ونىڭ ۇيىقتاپ الماي، مازاسىندانىپ جۇرگەنىن كورسەتتى، – دەدى زاپپاروۆ.

بەلسەندى دۋلات ءاعادىلدىڭ قايتىس بولعانى بۇگىن ساعات كۇندىزگى 12.00 شاماسىندا بەلگىلى بولدى. ءاعادىلدىڭ قازاسىنان كەيىن ەلدىڭ بىرنەشە قالاسىندا بەلسەندىلەر جينالىپ، بيلىكتەن ءاعادىل قازاسىنىڭ اق-قاراسىن ايتۋدى تالاپ ەتتى. نۇر-سۇلتاندا ىشكى ىستەر مينيسترلىگى عيمارتاتىنا بارعان بەلسەندىلەردى پوليسيا كۇشپەن الىپ كەتتى.

دۋلات ءاعادىل الەۋمەتتىك پروبلەمالار جانە ازاماتتىق قۇقىقتى ساقتاۋ ماسەلەسىن كوتەرىپ جۇرگەن. ول وتكەن جىلى بىرنەشە مارتە اكىمشىلىك جازاعا تارتىلىپ، كەمىندە 60 تاۋلىك قاماۋدا وتىرعان. 

43 جاستاعى بەلسەندى قاراشانىڭ ورتاسىندا اكىمشىلىك قاماۋدا وتىرعان سەلينوگراد اۋداندىق تەرگەۋ يزولياتورىنان قاشىپ كەتكەن ەدى. كەيىن ول ارەكەتىنىڭ سەبەبىن "زاڭسىز قۋدالاۋعا قارسىلىعىم" دەپ تۇسىندىرگەن. پوليسيا ەكى كۇن بويى ىزدەگەن بەلسەندى 15 قاراشادا ءوزى باس پروكۋراتۋرا الدىنا كەلگەن. كەيىن ول "سوت قاۋلىسىن ورىنداماعانى ءۇشىن" تاعى 6 تاۋلىككە سوتتالعان ەدى.