قازاقستاننىڭ تۇڭعىش پرەزيدەنتىنىڭ توراعالىعىمەن «Nur Otan» پارتياسى ساياسي كەڭەسى بيۋروسىنىڭ وتىرىسى ءوتتى. كەزدەسۋ بارىسىندا 18 ناۋرىزدا وتەتىن پارتيانىڭ ساياسي كەڭەسى وتىرىسىنىڭ كۇن ءتارتىبى تالقىلاندى.

بيۋرو وتىرىسىن اشقان ەلباسى پارتيا جۇمىسىن جانداندىرۋ باعدارلاماسى مەن «باقىتتى وتباسى»، «ارداگەرلەردى ارداقتايىق»، «كەدەرگىسىز كەلەشەك» اتتى الەۋمەتتىك جوبالاردىڭ جۇزەگە اسىرىلۋىنا وڭ باعا بەردى.

سونىمەن بىرگە، نۇرسۇلتان نازاربايەۆ پارتيانىڭ وڭىرلەردەگى جۇمىسىنا نازار اۋداردى.

– پارتيا باسشىلىعى، ءماجىلىس پەن ءماسليحات دەپۋتاتتارى جەرگىلىكتى جەرلەردى ارالاۋعا ءتيىس، سونىڭ ىشىندە، شالعاي اۋداندارعا بارۋى كەرەك. ادامدارمەن كەزدەسىپ، پروبلەمالاردى جان-جاقتى زەردەلەۋ، ولاردى شەشۋ ماڭىزدى. بۇل ماسەلەلەردىڭ بارلىعى وڭىرلىك پارتيا باعدارلامالارىندا كورىنىس تابۋى قاجەت، – دەدى پارتيا ءتوراعاسى.

سونىمەن قاتار، بيۋرو وتىرىسىندا وسى جىلدىڭ 30 ناۋرىزى مەن 16 مامىرى ارالىعىندا ەلدىڭ بارلىق وڭىرلەرىندە جاڭا فورماتتا پارتيانىڭ ىشكى ىرىكتەۋىن – پرايمەريز وتكىزۋ تۋرالى شەشىم قابىلداندى.

– بۇل پارتيا اتىنان ماسەلەلەردى شەشەتىن ەڭ بەلسەندى جانە سەنىمدى مۇشەلەردى انىقتاۋعا مۇمكىندىك بەرەتىن دۇرىس شەشىم دەپ سانايمىن، – دەدى ەلباسى.

وتىرىستىڭ قورىتىندىسى بويىنشا بيۋرونىڭ قاۋلىسى قابىلداندى. وعان سايكەس ىرىكتەۋدى جۇرگىزۋ ەرەجەسىنىڭ جوباسى الدىن-الا ماقۇلداندى. ول 18 ناۋرىزدا ساياسي كەڭەستىڭ وتىرىسىندا بەكىتىلەدى.

پرايمەريز ناتيجەسىندە «Nur Otan» پارتياسىنان ءماجىلىستىڭ جانە بارلىق دەڭگەيدەگى ءماسليحاتتاردىڭ سايلاۋالدى پارتيالىق تىزىمدەرىنە كانديداتتار انىقتالادى دەپ جوسپارلانىپ وتىر.

سونداي-اق، پارتيانىڭ 2025 جىلعا دەيىنگى سىبايلاس جەمقورلىققا قارسى ءىسقيمىل باعدارلاماسىن جۇزەگە اسىرۋدىڭ جول كارتاسى بەكىتىلدى.