قازاقستان تۋريزم قاۋىمداستىعىنىڭ ديرەكتورى راشيد شايكەنوۆ كوروناۆيرۋستىڭ تارالۋى تۋريزم سالاسىنا كەسىرىن تيگىزىپ وتىرعانىن ءمالىم ەتتى، دەپ جازادى 365info.kz.
– ءبىز كەزىككەن ەڭ العاشقى قيىندىق – اۋە رەيستەردىڭ توقتاتىلۋى. قىتايمەن بايلانىس جابىلعان. 1 ناۋرىزدان باستاپ وڭتۇستىك كورەيا جانە يرانمەن اۋە قاتىناسى قىسقاردى. يرانعا قازاقستاندىقتار كوپ بارمايتىندىقتان، ول جاقتىڭ جابىلۋى ءبىز ءۇشىن قيىندىق تۋدىرمايدى. ءبىراق وسى ۋاقىتتا وتانداستارىمىز وڭتۇستىك كورەياعا مەديسينالىق جانە ەم-ساۋىقتىرۋ ماقساتىمەن ءجيى باراتىن. سوندىقتان بۇل ەلگە رەيستەردىڭ ازايتىلۋىنىڭ اسەرى سەزىلۋدە. سونداي-اق ازاماتتار توپتاسىپ باراتىن جەردىڭ ءبىرى – حاينان ەدى. مۇندا دا كەدەرگىلەرگە تاپ بولدىق. ۆيرۋس ەپيدەمياسى تايلاند پەن ەگيپەت سياقتى وزگە دە ماۋسىمدىق باعىتتارعا اسەر ەتۋدە. ءبىر جاعىنان، بىزگە قىتايدا ۆيرۋسقا شالدىعۋشىلار سانى كەمىگەنى جونىندە اقپارات تۇسۋدە. ءبىراق بارۋعا شەكتەۋ قويىلعان ورىندارعا جاڭا ەلدەر قوسىلىپ جاتىر. بۇل سىرتقا شىعۋشىلارعا اسەر ەتپەي قويمايدى، – دەيدى ول.
راشيد شايكەنوۆتىڭ سوزىنشە جاعداي ىشكى تۋريزمگە دە اسەر ەتكەن.
– مەرەكەلىك دەمالىستاردا قازاقستاندىقتار ادەتتە ەل ىشىندە ساپارعا شىعاتىن. بيىل قالاي بولاتىنى بەلگىسىز. جاعدايدى باعامداۋ قيىن بولىپ تۇر. بيلىكتەگىلەردىڭ "قازاقستاندا كوروناۆيرۋس جوق" دەگەنىنە قاراماستان، ازاماتتار دەنساۋلىعىنا الاڭداۋلى، ادام كوپ باراتىن شارالارعا قاتىسۋدى سيرەتكەن، – دەدى قاۋىمداستىق ديرەكتورى.
كوروناۆيرۋس ءقاۋپىنىڭ كەسىرىنەن شەتەلدىك تۋريستەر قازاقستانعا جوسپارلانعان تۋرلارىنان كوپتەپ باس تارتىپ جاتقانعا ۇقسايدى.
ساراپشى سانيتارلىق قاۋىپسىزدىككە جاۋاپتى مەملەكەتتىك ورگانداردىڭ ساياساتى تۇسىنىكسىز ەكەنىن ايتتى. "اندا بارۋعا بولمايدى، مىندا بارۋعا بولمايدى" دەگەندەي اقپاراتتار ءجيى شىعادى. سونداي اقپاراتتاردىڭ قاتارىندا "شارىنعا بارۋعا بولمايدى" دەگەن دەرەك كەزدەسكەن. ءبىراق ارتىنان بۇل جالعان ەكەنى انىقتالدى.
"وسىنداي فاكتورلار كەشەنى تۋريزمگە تەرىس اسەر ەتىپ جاتىر" دەيدى مامان.
پىكىر قالدىرۋ