الماتىدا وتكەن Absolute Championship Akhmat 105 ارالاس جەكپە-جەك ءتۋرنيرىنىڭ باستى كەزدەسۋىندە جارتىلاي جەڭىل سالماقتاعى قازاقستاندىق سپورتشى ارمان وسپانوۆ (9-3) رەسەيلىك راسۋل ميرزايەۆتى (18-2) نوكاۋتپەن جەڭدى، دەپ جازادى sport.kz.
5 راۋندقا شاقتالعان جەكپە-جەك العاشقى راۋندتا اياقتالدى.
بۇل – ارمان وسپانوۆتىڭ كاسىبي مما-دەگى ونىنشى جەڭىسى. راسۋل ميرزايەۆ بولسا ءۇشىنشى رەت جەڭىلىپ وتىر.
كەزدەسۋدەن كەيىن ءسوز العان سپورتشى و باستا وتانىندا جەكپە-جەككە شىققىسى كەلمەگەنىن ايتتى.
– قارسىلاسىما شەكسىز العىس بىلدىرگىم كەلەدى، ونى قاتتى قۇرمەتتەيمىن. وعان مۇنىمەن توقتاما، العا ءجۇر، سەنى ءالى تالاي جەڭىس توسىپ تۇر دەگىم كەلەدى. بارلىق جانكۇيەرىمە راحمەت ايتام! قولداۋلارىڭىزعا مىڭ العىس! جانكۇيەرلەر ەنەرگياسى قىزدىرا ءتۇستى. باسىندا وتانىمدا جەكپە-جەك وتكىزگىم كەلمەگەن. وسى وكتوگوندا جەڭىلگەن كەزدەرىم دە بولدى. ول كەزدە مەن برازيليالىق سپورتشىمەن شىققانمىن. سودان كەيىن قازاقستاندا كەزدەسۋ وتكىزبەيمىن دەپ وزىمە ءسوز بەرگەن ەدىم. ول كەزدە قاتتى تولقىنىستا بولدىم. ءبىراق اللاعا شۇكىر، ءبارى قولدان كەلدى. كومانداما، ۇيىمداستىرۋشىلارعا، بارلىعىنا العىسىمدى بىلدىرەمىن!، – دەدى وسپانوۆ.
پىكىر قالدىرۋ