جۋرناليست، قوعامدىق-ساياسي "جاسالاش" گازەتىنىڭ بۇرىنعى قىزمەتكەرى اسحات اساندى 174-باپتىڭ (الەۋمەتتىك ارازدىقتى قوزدىرۋ) ءبىرىنشى تارماعى بويىنشا قوزعالعان قىلمىستىق ءىس نەگىزىندە پوليسياعا شاقىرعان.
بۇل تۋرالى جۋرناليست 5 ناۋرىزدا تۇندە ءوزىنىڭ facebook پاراقشاسىندا حابارلادى.
"بۇگىن تەرگەۋشى شاقىرتىپ، ۇستىمنەن 174 باپتىڭ ءبىرىنشى تارماعى بويىنشا، الەۋمەتتىك نارازىلىق تۋدىردى دەگەن ايىپپەن، قىلمىستىق ءىس قوزعالعانىن ءبىلدىم. جازا – 2 جىلدان 7 جىلعا دەيىن باس بوستاندىعىنان ايىرۋ. وعان تۇرتكى بولعان "جاس الاش" گازەتىندە جارىق كورگەن "ەكس-پرەزيدەنتتى ينتەرپول ىزدەپ، سۇراۋ سالاتىن كۇن تۋسا..." دەگەن ماقالام. تەرگەۋشى قويعان سۇراقتارعا جاۋاپ بەردىم. جالپى اڭگىمەمىز سىپايى تۇردە ءوتتى. ماقالانى سوت-ساراپتاماسىنان وتكىزۋگە كوميسسيا قۇرىلعان كورىنەدى. مەنىڭ ويىمشا، ورگانداردىڭ تۇپكى كوزدەگەنى ينگا يمانباي سەكىلدى" دەلىنگەن جۋرناليست جازباسىندا.
الايدا 6 ناۋرىز كۇنى ازاتتىق راديوسىنىڭ ماتەريالىندا ماقالا اۆتورى كۋاگەر رەتىندە تەرگەلگەنى حابارلاندى.
اسحات اسان مەن جاسالاش گازەتىنىڭ بۇرىنعى باس رەداكتورى ينگا يمانباي ءىستى جۋرناليستىك قىزمەتىمەن بايلانىستىرادى.
قىلمىستىق ىسكە نەگىز بولعان ماقالا باسىلىمدى جۋرناليست ينگا يمانباي باسقارىپ تۇرعاندا شىققان. ادام قۇقىقتارى جانە زاڭدىلىقتى ساقتاۋ بيۋروسىنىڭ سايتى ءجۋرناليستى تەرگەۋ كەزىندە "ماقالانى جازۋدا ينگا يمانبايدىڭ ءرولى قانشالىقتى بولدى" دەپ سۇرالعانى، وعان جۋرناليست "ءوزىمنىڭ قالاۋىم بويىنشا جازدىم" دەپ جاۋاپ بەرگەنىن حابارلاندى.
ينگا يمانبايدىڭ سوزىنشە، جۋرناليست اسحات اساننىڭ ماقالاسى وتكىر سىنعا، اششى شىندىققا تولى. "ءبىراق، ول جەردە ءبىر اۋىز وتىرىك جوق. زاڭعا قايشى ءبىر سويلەم تابا المايسىزدار" دەيدى ول.
