كوروناۆيرۋستىڭ سالدارىنان الماتىداعى ءبىرقاتار قوعامدىق كولىك ءجۇرىسىن توقتاتۋى مۇمكىن، - دەپ حابارلايدى Qamshy.kz اقپارات اگەنتتىگى كتك ارناسىنىڭ دەرەگىن نەگىزگە الىپ. 

سەبەبى، اۆتوبۋستاردى جوندەۋگە قاجەتتى قىتايدان اكەلىنەتىن قوسالقى بولەشەكتەر ەلگە جەتكىزىلمەي جاتىر. كەي تاسىمالداۋشى كومپانيالار ماسەلە دەر كەزىندە شەشىلمەسە، قوعامدىق كولىك قوزعالىسى قيىندىققا تاپ بولادى دەيدى.   

الىپ شاھارداعى احۋال قىتايدان الىنعان اۆتوبۋستارعا قاتىستى. الايدا قالالىق اكىمدىك تاسىمالداۋشىلار تاراپىنان الاڭداۋشىلىق تۋىنداعانىن جاسىرماسا دا، قارا اسپاندى توندىرۋگە نەگىز جوق دەگەن سەنىمدە. اكىمدىك وكىلىنىڭ ايتۋىنشا، قالاداعى اۆتوبۋس پاركتەرىندە قوسالقى بولشەكتەر كەمى ەكى ايعا جەتەدى. ونىڭ ۇستىنە شەنەۋنىكتەر مەگاپوليستەگى قوعامدىق كولىكتەردىڭ 20 پايىزى عانا قىتايدان ساتىپ الىنعانىن ايتادى. ال "رەسەي، وزبەكستان جانە وزگە ەلدەردەن الىنعان اۆتوبۋستارعا قاتىستى ەش ماسەلە جوق" دەيدى اكىمدىكتەگىلەر.

"قازىرگە ۋاقىتتا قىتايدا بولعان كوروناۆيرۋس جاعدايىنا بايلانىستى ول جاقتان  قوسالقى سايماندار كىشكەنە كەشىگىپ كەلىپ جاتىر. دەگەنمەن ءبىزدىڭ اۆتوبۋس پاركتەرىندە ءبىر جارىم، ەكى ايعا جەتكىلىكتى قوسالقى بولشەكتەر بار. وسى 16 ناۋرىزدان كەيىن تاعى قوسىمشا بولشەكتەرمەن تاعى ءبىر كونتەينەر كەلەدى" دەدى الماتى قالالىق موبيلدىلىك باسقارماسىنىڭ ءبولىم باسشىسى اسەت تولەۋىشوۆ.