بۇگىن پالاتا سپيكەرى نۇرلان ءنىعماتۋليننىڭ توراعالىعىمەن وتكەن ءماجىلىستىڭ جالپى وتىرىسىندا اكىمشىلىك راسىمدىك-پروسەستىك كودەكس جوباسى جانە وعان ىلەسپە زاڭ جوباسى ءبىرىنشى وقىلىمدا ماقۇلداندى.
جالپى وتىرىستا ءماجىلىس دەپۋتاتى نارينە ميكاەليان سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسحات ورازبەككە سيفرلاندىرۋدى بەلسەندى جىلجىتۋ جاعدايىندا اكىمشىلىك ادىلەتتى ەنگىزۋگە قاتىستى مەملەكەتتىك تىلدە ءبىرقاتار سۇراق قويدى. الايدا ۆيسە-مينيستر سۇراقتارعا ورىس تىلىندە جاۋاپ بەردى.
جاۋاپتى تىڭداپ بولعان سوڭ ءماجىلىس ءتوراعاسى مەملەكەتتىك تىلدە قويىلعان سۇراققا قازاق تىلىندە جاۋاپ بەرمەگەن اسحات ورازبەكتى سىنعا الدى.
– ارينە، بىزدە اۋدارما بار. وسى زالدا وتىرعان ءاربىر ازاماتقا قاي تىلدە سويلەيمىن دەسە دە جاعداي جاسالعان. ءبىراق باسقا ۇلتتىڭ ازاماتتارى قازاق تىلىندە سايراپ تۇرعاندا، ءسىزدىڭ مەملەكەتتىك تىلدە جاۋاپ بەرمەگەنىڭىز دۇرىس ەمەس، – دەدى نۇرلان نىعماتۋلين.
ماقۇلدانعان كودەكس جوباسىنىڭ نەگىزگى ماقساتى – ازاماتتارعا باسقارۋشىلىق شەشىمدەردى قابىلداۋ پروسەسىنە ناقتى قاتىسۋعا مۇمكىندىك بەرەتىن كەپىلدىكتەردى بەكىتۋ جانە بيلىك ورگاندارىمەن بىرگە جوعارى تۇرعان ورگان مەن سوتتا داۋلاردى قاراۋ كەزىندە ازاماتتاردىڭ قۇقىقتارىن قورعاۋدىڭ ءتيىمدى تەتىكتەرىن بەلگىلەۋ.
