«Nur Otan» پارتيالىق باقىلاۋ كوميسسياسى مەن ايماقتارداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستەردىڭ جۇمىسىن كۇشەيتەدى. بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك instagram-داعى پاراقشاسىندا حابارلادى.
"مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، «Nur Otan» پارتيالىق باقىلاۋ كوميسسياسى مەن ايماقتارداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستەردىڭ جۇمىسىن كۇشەيتەدى. بۇل پارتيانىڭ قوعامدىق قابىلداۋلارىنا تۇرعىنداردان كەلىپ تۇسكەن وتىنىشتەردى ءجىتى باقىلاۋ ماقساتىندا جاسالىپ جاتىر.
⠀
مۇندا ازاماتتاردىڭ وتىنىشتەرىنە جاۋاپ بەرمەيتىن، سونداي-اق ب ا ق پەن الەۋمەتتىك جەلىلەردە تۇرعىندار كوتەرگەن ماسەلەلەر بويىنشا وزدەرىنە جاۋاپكەرشىلىك الىپ، دەر كەزىندە ءتيىستى شەشىمدەر قابىلدامايتىن لاۋازىمدى تۇلعالار تۋرالى ءسوز بولىپ وتىر.
⠀
«Nur Otan» سونىمەن قاتار داعدارىسقا قارسى ءىس-شارالاردى جۇزەگە اسىرۋعا بولىنگەن قاراجاتتىڭ اشىق ءارى ءتيىمدى جۇمسالۋىنا پارتيالىق جانە قوعامدىق باقىلاۋدى قامتاماسىز ەتەدى" ب.بايبەك جازباسىندا.
پىكىر قالدىرۋ