قازاقستان دەنساۋلىق ساقتاۋ مينيسترلىگىنىڭ دەرەگىنشە، ەلدە 120 مەديسينا قىزمەتكەرىنەن كورناۆيرۋس تابىلعان. ولاردىڭ 67ء-ى كوروناۆيرۋس ىندەتىن جۇقتىرعان نەمەسە اۋرۋ بەلگىلەرى بار ادامدارمەن جۇمىس ىستەگەن.  بۇل كورسەتكىش ەلدەگى ىندەت تابىلعان ادامداردىڭ 10%-نا تەڭ. 

مينيسترلىك تاراتقان اقپاراتقا قارعاندا، كوروناۆيرۋستان نۇر-سۇلتان جانە الماتى قالاسىنداعى دارىگەرلەر قاتتى زارداپ شەگىپ وتىر. ەل استاناسىندا 31 مەديسينا قىزمەتكەرىنەن ىندەت تابىلعان. ال الماتىدا ۆيرۋس جۇقتىرعان 119 ناۋقاستىڭ 21ء-ى مەديسينا قىزمەتكەرى.  بۇدان بولەك، سولتۇستىك قازاقستان وبلىسىندا 6 دارىگەردەن، قارعاندى وبلىسىندا 4 دارىگەردەن، اتىراۋ وبلىسىندا 2 دارىگەردەن، اقمولا، قىزىلوردا جانە تۇركىستان وبلىسىنىڭ ءارقايسىندا ءبىر-بىر دارىگەردەن كورناۆيرۋس انىقتالعان. 

دەنساۋلىق ساقتاۋ مينيسترلىگىنىڭ حابارلاۋىنشا، كوروناۆيرۋس ىندەتىن جۇقتىرعان نەمەسە اۋرۋ بەلگىلەرى بار ادامدارمەن جۇمىس ىستەگەن ءبىر مەديسينا قىزمەتكەرىنىڭ جاعدايى – اۋىر، توعىزىنىڭ جاعدايى – ورتاشا. ال قالعان 57 دارىگەردىڭ جاعدايى – قاناعاتتانارلىق. 

پرەزيدەنت قاسىم-جومارت توقايەۆ كورناۆيرۋسپەن كۇرەسىپ جاتقان دارىگەرلەرگە  ۇستەمە اقى بەرىلەتىنىن ايتقان. مەديسينا قىزمەتكەرىنە كوروناۆيرۋس ينفەكسياسى جۇققان جاعدايدا 2 ملن تەڭگە كولەمىندە ساقتاندىرۋ تولەم بەرىلەدى. قايتىس بولعان جاعدايدا وتباسىنا 10 ملن تەڭگە بەرىلەدى.

سوڭعى اقپارات بويىنشا، قازاقستاندا 685 ادامنان كوروناۆيرۋس تابىلعان. التى ادام ۆيرۋستان كوز جۇمىپ، 50 ادام جازىلىپ شىقتى.