قامشى رەداكسياسىنا وقىرمانداردان الماتىنىڭ شىعىس جاعىنداعى تالعار تاس جولىنا قويىلعان بلوك-بەكەتتە جۇڭگو ازاماتتارى جۇرگەنى تۋرالى اقپارات كەلىپ ءتۇستى. اتالعان ورىنعا بارعان قامشى ءتىلشىسى جۇڭگو ازاماتتارى دەلىنگەن ادامدار بلوك-بەكەتتەرگە قويىلىپ جاتقان دەنە قىزۋىن ولشەيتىن قۇرالداردى (تەپلوۆيزور) ىسكە قوساتىن ماماندار ەكەنىن انىقتادى.

تەپلوۆيزورلاردى "استانا موتورس" كومپانياسى ورناتىپ جاتىر. تالعار تراسساسىنداعى بلوك-بەكەتكە قويىلعالى جاتقان قۇرىلعىنىڭ ىسكە قوسىلۋ بارىسىن جەكە قاداعالاۋعا كەلگەن "استانا گرۋپپ" حولدينگىنىڭ يەسى نۇرلان سماعۇلوۆ قۇرىلعى وزىقتىعىمەن ەرەكشەلەنەتىنىن ايتتى.

كاسىپكەر نۇرلان سماعۇلوۆتىڭ جۋرناليستەرگە پىكىر ءبىلدىرۋ ءساتى

– ءبىز قوعام الدىنداعى الەۋمەتتىك مىندەتىمىزدى تولىقتاي سەزىنەمىز. العاش تەپلوۆيزورلاردى مەگا ساۋدا ورتالىقتارىنا قويدىق. قۇرىلعى  ءبىر مەزەتتە 30 ادامنىڭ دەنە قىزۋىن ولشەۋگە قاۋقارلى. ءارى ءدال كورسەتەدى. قاتەلەسىپ، بىر-ەكى گرادۋسقا اۋىتقىمايدى. كەيىنىرەك مۇنداي پايدالى قۇرىلعىلاردى قالالارىمىزداعى ادام كوپ كىرىپ-شىعاتىن بلوك-بەكەتتەرگە نەگە ورناتپاسقا دەگەن ويعا كەلدىك. تەپلوۆيزورلاردى الماتى بويىنشا تالعار تراسساسىنداعى بەكەتتەن بولەك، قۇلجا، قاپشاعاي، تاۋ سامالى تاس جولدارىنداعى سونداي-اق التىن وردا بازارى ماڭىنداعى بەكەتتەرگە ورناتىپ جاتىرمىز. الماتىمەن قاتار نۇر-سۇلتان، شىمكەنت، قاراعاندى قالالارىنا دا وسىنداي تەپلوۆيزورلار قويىلادى. قۇرىلعىلاردى شانحايلىق ارىپتەستەرىمىزبەن ىنتىماقتاسا ورناتىپ جاتىرمىز، – دەگەن كاسىپكەر كوروناۆيرۋس ىندەتىنەن قۇتىلىپ، قازاقستاندىقتاردىڭ ادەتتەگى ءومىر-سالتىنا تەزىرەك ورالۋىنا تىلەكتەستىك ءبىلدىردى.

قامشى ءتىلشىسى بلوك-بەكەتتەن جۇڭگو ازاماتتارىن كەزدەستىرمەدى. ولار قۇرىلعىعا تەحنيكالىق قولداۋ كورسەتۋ كەزىندە عانا كەلەتىنى بەلگىلى بولدى.

وتكىزۋ پۋنكتىندەگى شاتىر ىشىنە قويىلعان تەپلوۆيزور

تالعار تراسساسى بويىنداعى بلوك-بەكەتتە جاعداي بەلگىلەنگەن تارتىپتە ءجۇرىپ جاتىر.

بەكەتتەن ازىق-تۇلىك تاۋارلارى مەن مەديسينالىق قاجەتتىلىكتەر تاسيتىن كولىكتەردىڭ كىرىپ-شىعۋعا رۇحسات بەرەتىن قۇجاتتارى تەكسەرىلىپ، وتكىزىلۋدە.

بلوك-بەكەتتە تەكسەرىلىپ جاتقان كولىكتەر

بلوك-بەكەتكە "وتكىزىپ قالار" دەگەن ويمەن كەلگەن بىرنەشە ازامات ءجۇر. سولاردىڭ ءبىرى دۋمان ىقشاماۋدانىندا قاراۋىل بولىپ ىستەيتىن تالعار اۋدانىنىڭ تۇرعىنى (ەسىمىن اتاۋدان باس تارتتى) 15 كۇندىك جۇمىسىنان شىعىپ، ۇيىنە قايتا الماي جۇرگەنىن، بەكەتتى كۇزەتۋشىلەر ءوزىن وتكىزبەي تۇرعانىن ايتتى.

"بەكەتتەردەن ەشكىمدى وتكىزبەيتىنىن ەستىدىم، سوندا دا وتكىزىپ قالار دەگەن ويمەن كەلىپ ەدىم" دەگەن تالعار اۋدانىنىڭ تۇرعىنى وتباسىنا ورالا الماسا، "بەكەت اشىلعانعا دەيىن تۋىستارىمدىكىندە بولام، ەندى باسقا نە ىستەيمىن.  وعان دەيىن سمەنىم كەلسە، جۇمىسقا شىعا بەرەمىن" دەيدى.

بلوك-بەكەتتىڭ ەكى جاعىندا تۇرىپ بىر-بىرىنە قۇجاتتار، پاكەتكە سالىنعان زاتتار بەرىپ جىبەرىپ جاتقاندار دا بار. پوليسيا قىزمەتكەرلەرى بەكەتتىڭ ءبىر جاعىنان ۇستاتىپ جىبەرگەن زاتتى بەكەتتىڭ ەكىنشى جاعىنا جەتكىزىپ بەرۋدە.