جامبىل وبلىسى اكىمىنىڭ ورىنباسارى ەرجان جىلقىبايەۆ مەركى اۋدانىنداعى دارىگەر-ينفەكسيونيستىڭ شاعىمى بويىنشا اۋرۋحانا باسشىلارىنىڭ جۇمىستان بوساتىلعانىن مالىمدەدى. بۇل تۋرالى zhambyl.gov.kz حابارلادى. 

– كوميسسيا اۋداندىق اۋرۋحانا جۇمىسىنىڭ، ونىڭ ىشىندە دارىگەرلەر ت.وردابايەۆا مەن ق.تورەقۇلدىڭ وتىنىشتەرىندە كورسەتىلگەن فاكتىلەر بويىنشا تەكسەرۋ شارالارىن جۇرگىزدى. كوپتەگەن مالىمەتتەر راستالدى. ۇجىمدا جاعىمسىز مورالدىق-پسيحولوگيالىق جاعداي قالىپتاسقان دەسەك، وعان ءبىرىنشى كەزەكتە ەمدەۋ مەكەمەسى باسشىلىعىنىڭ ءوز كاسىبي مىندەتتەرىنە جاۋاپسىز قاراعاندىعى سەبەپ بولعان، – دەدى ە.جىلقىبايەۆ.

جول بەرىلگەن بۇزۋشىلىقتار ءۇشىن اۋرۋحانانىڭ باس دارىگەرىنىڭ مىندەتىن اتقارۋشى د.نۇسىپبايەۆ، باس دارىگەردىڭ ەمدەۋ ءىسى جونىندەگى ورىنباسارى ج. شويبەكوۆا جانە باس ەسەپشى ز. مۇقايەۆا قىزمەتىنەن بوساتىلدى.

ەرجان جىلقىبايەۆ تەكسەرۋ ماتەريالدارىنا ءتيىستى شارالاردى قابىلداۋ جانە قاراۋدى قۇقىق قورعاۋ ورگاندارىنا تاپسىرىلاتىنىن اتاپ ءوتتى.

سونداي-اق، ول جاڭادان تاعايىندالعان اۋرۋحانانىڭ باس دارىگەرى رايقۇل نۇرجانوۆتى تانىستىرىپ، وعان ورىن العان زاڭبۇزۋشىلىقتاردى جويۋ جانە ۇجىمداعى مورالدىق-پسيحولوگيالىق احۋالدى قالپىنا كەلتىرۋ سىندى ماڭىزدى مىندەتتەردى جۇكتەدى.

وبلىس اكىمىنىڭ ورىنباسارى ءوز سوزىندە مەديسينا قىزمەتكەرلەرىنىڭ قۇقىقتارىن قورعاۋ ماسەلەلەرى ەرەكشە باقىلاۋدا ەكەنىن جەتكىزدى. الداعى ۋاقىتتا دا ولاردى قاجەتتى قورعانىس قۇرالدارىمەن قامتاماسىز ەتۋ، جۇمىستاعى قاۋىپسىزدىك شارالارىن نىعايتۋ جانە ماتەريالدىق قولداۋ ءۇشىن بارلىق مۇمكىندىكتەر جاسالاتىنىن تىلگە تيەك ەتتى.

ە.جىلقىبايەۆ دارىگەرلەر ت.وردابايەۆا مەن ق.تورەقۇلدىڭ قانداي دا ءبىر زاڭسىز ىس-ارەكەتتەردەن قورقۋىنا نەگىز جوق، ولار وبلىس باسشىلىعىنىڭ تىكەلەي باقىلاۋىندا بولادى دەپ سەندىردى.