الماتى قالاسىنىڭ اكىمى باقىتجان ساعىنتايەۆ ءمودۋلدى جۇقپالى اۋرۋلار اۋرۋحاناسىنىڭ اشىلۋىنا قاتىستى. بۇل تۋرالى اكىمدىكتىڭ باسپا ءسوز قىزمەتى حابارلادى.

18 كۇننىڭ ىشىندە بوي كوتەرگەن جاڭا مەديسينالىق مەكەمە كوروناۆيرۋستىق ينفەكسيامەن اۋىراتىن ناۋقاستاردى ەمدەۋگە ارنالعان.

اۋرۋحانانى ارالاپ شىققان قالا اكىمى ب. ساعىنتايەۆ كەشەننىڭ ساپاسى مەن مەديسينالىق جابدىقتارمەن جاراقتاندىرىلۋىنا جوعارى باعا بەردى. سونداي-اق ول كەشەندى قىسقا مەرزىمنىڭ ىشىندە سالىپ بىتكەن قۇرىلىسشىلارعا العىسىن ءبىلدىردى. جاڭا جۇقپالى اۋرۋلار كەشەنى ۋاقىتشا عيمارات بولعانىنا قاراماستان، وسىنداي مەكەمەلەرگە قويىلاتىن حالىقارالىق تالاپتارعا جاۋاپ بەرەدى.

– بۇگىن ءبىزدىڭ دارىگەرلەر مەن بارلىق مەديسينالىق قىزمەتكەرلەر ۇيقىسىز ءارى دەمالىسسىز كوروناۆيرۋستىق ينفەكسيامەن كۇرەسۋدە. وزدەرىن اياماي، ءبىزدى قورعاۋدا. ءبىزدىڭ مىندەتىمىز – ولاردىڭ جۇمىسىنا بارلىق جاعدايدى جاساۋ. جاڭا كەشەن جۇقپالى ورىنداردىڭ جەتكىلىكتى قورىن قۇرۋعا مۇمكىندىك بەرەدى. بۇل قالاداعى ەپيدەميولوگيالىق جاعدايدى تۇراقتاندىرۋعا ىقپال ەتەدى، – دەدى باقىتجان ساعىنتايەۆ.

جۇقپالى اۋرۋلار اۋرۋحاناسى 280 ادامعا ەسەپتەلگەن. ىشىندە 9 كلينيكالىق بولىمشە، 28 توسەككە ارنالعان رەانيماسيا بولىمشەسى، ءبىر كىسىلىك جانە دالاعا بولەك شىعۋعا بولاتىن 10 پالاتا، ديناميكالىق باقىلاۋدا بولاتىن بەس ءبىر كىسىلىك پالاتالارى بار قابىلداۋ ءبولىمى ورنالاسقان.

ءمودۋلدى كەشەندە پەرسونالعا ارنالعان ءۇي-جاي قاراستىرىلعان. زەرتحاناعا ارنالعان ءتورت ءۇي-جاي، كت، رەنتگەن، ەندوسكوپيالىق جابدىقتار، ۋدز جانە ەلەكتروكارديوگراف ورناتۋعا ارنالعان جەكە ءۇي-جايلار بار.

شتاتتا 75 دارىگەر، 100 مەدبيكە جانە كىشى مەديسينالىق قىزمەتكەرلەر بار. مەكەمەنىڭ بارلىق قىزمەتكەرلەرى «اتاكەنت پارك وتەل» قوناق ۇيىنە ورنالاستىرىلدى. قىزمەتكەرلەر تاڭەرتەڭ جانە كەشكى ۋاقىتتا تەگىن تاسىمالدانادى.

اۋرۋحانا زاماناۋي مەديسينالىق جابدىقتارمەن جابدىقتالعان. رەانيماسيا بولىمىنە 28 ءوجج اپپاراتى قويىلدى. سونداي-اق، اۋرۋحانادا كومپيۋتەرلى توموگراف، قان گازى مەن ەلەكتروليتتەر، مەتابوليتتەر اناليزاتورى، ەلەكتروكارديوگراف، مونيتورلار، پەرفۋزورلار، جەدەل دياليز جۇيەسى، مەديسينالىق دياگنوستيكالىق رەنتگەن جۇيەسىنىڭ كەرەك-جاراقتارى، ۋلترادىبىستىق زەرتتەۋگە ارنالعان اپپاراتتار، باكتەريسيدتى شامدار سياقتى جابدىقتار ورنالاستىرىلدى. بۇدان وزگە ءموبيلدى رەنتگەن اپپاراتى، زەرتحاناعا ارنالعان جابدىقتار دا بار.

ءمودۋلدى كەشەن ءوزارا گالەرەيا ارقىلى بايلانىسقان ءبىر قاباتتى ەكى جانە ەكى قاباتتى ءتورت كورپۋستان تۇرادى. ينجەنەرلىك كوممۋنيكاسيالار جۇيەسى بويىنشا دا، اتاپ ايتقاندا جەلدەتكىش پەن كونديسيونەر ورناتۋ، سۋمەن جابدىقتاۋ جانە كارىز جۇيەسىن جۇرگىزۋ، ەلەكترلى جىلىتۋمەن جابدىقتاۋ جۇمىستارى اياقتالدى.

شارۋاشىلىق-تۇرمىستىق سۋ اعىنى ارنايى جيناعىش ىدىسقا قۇيىلىپ، جينالادى. ءورت دابىلى جانە بەينەباقىلاۋ جۇيەسىمەن دە قامتاماسىز ەتىلدى. ترانسفورماتورلىق قوسالقى ستانسانى ورناتۋ قاراستىرىلعان.

ەمحاناعا كىرۋ مەن شىعۋ ءۇش كىرۋ ايماقتارى ارقىلى جۇزەگە اسىرىلادى. مەكەمە سىرتىندا جانە ىشكى ايماقتا كولىك قويۋعا ارنالعان ورىندار بار. سونداي-اق، اۋرۋحانا اۋماعىندا كولىكتى وڭدەۋگە ارنالعان الاڭ، ءبىرقاتار تەحنيكالىق قۇرىلىستار قاراستىرىلعان.