الماتىدا قالا اكىمى باقىتجان ساعىنتايەۆتىڭ توراعالىعىمەن سىبايلاس جەمقورلىققا قارسى ءىس-قيمىل ماسەلەلەرى بويىنشا ونلاين-كەڭەس ءوتتى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

كەڭەسكە الماتى قالاسىنىڭ سىبايلاس جەمقورلىققا قارسى قىزمەتىنىڭ باسشىسى نىعمەدجان ساپاروۆ جانە جەرگىلىكتى اتقارۋشى ورگانداردىڭ باسشىلارى قاتىستى.

سىبايلاس جەمقورلىققا قارسى ۆەدومستۆو باسشىسى قول استىنداعى باسشىلار اراسىندا سىبايلاس جەمقورلىققا قارسى كۇرەس جاۋاپكەرشىلىگىن ارتتىرۋ، سىبايلاستىق ارەكەتتەر ءۇشىن ءتيىستى شارالار قولدانباي جاتقاندىعى تۇرعىسىندا بايانداما جاسادى.

كەڭەس بارىسىندا، سونداي-اق، مەملەكەتتىك ورگانداردىڭ اشىقتىعى مەن ەسەپتىلىگى، اشىق بيۋدجەتتەردىڭ publicbudget.kz ينتەراكتيۆتى كارتاسىن ىسكە اسىرۋ ماسەلەلەرى، مەملەكەتتىك ساتىپ الۋ كەزىندە باعانى كوتەرۋ دەرەكتەرىن انىقتاپ، بيۋدجەت قاراجاتىن ماقساتسىز پايدالانۋدى جانە «ءبىرىڭعاي ساتىپ الۋ تەرەزەسى» اقپاراتتىق-تالداۋ جۇيەسى ارقىلى جىمقىرۋ بولدىرماۋ تۋرالى ايتىلدى.

كەڭەس قورىتىندىسى بويىنشا قالا اكىمى باقىتجان ساعىنتايەۆ بارلىق مەملەكەتتىك ورگانداردىڭ باسشىلارىنا سىبايلاس جەمقورلىققا قارسى ءىس-قيمىل زاڭناماسىن قاتاڭ ساقتاۋدى ەسكەرتتى جانە ءبىرقاتار ناقتى تاپسىرمالار بەردى.

مەملەكەتتىك ورگانداردىڭ باسشىلارىنا قىزمەتتىڭ اشىقتىعى مەن ايقىندىلىعىن ارتتىرۋ، ينتەراكتيۆتى كارتانى ودان ءارى ىسكە اسىرۋ بويىنشا باقىلاۋ جۇرگىزۋ، مەملەكەتتىك ساتىپ الۋدى وتكىزۋ بويىنشا جۇمىستى جانداندىرۋ، سونداي-اق، سىبايلاس جەمقورلىققا قارسى ءىس-قيمىل بويىنشا كەشەندى شارالار ازىرلەۋ ۇسىنىلدى.