كەشە قازاقستان مۇسىلماندارى ءدىني باسقارماسىنىڭ «حيكمەت» ستۋدياسى قاسيەتءتى ءقادىر ءتۇنىنىڭ قۇرمەتىنە ءدىني باسقارمانىڭ Youtube كانالى جانە Instagram-داعى پاراقشاسى ارقىلى 00:30-دان 02:40-قا دەيىن «مىڭ ايدان دا قايىرلى ءقادىر ءتۇنى» اتتى ونلاين باعدارلاماسىن وتكىزدى. 

تىكەلەي ەفير قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ ءقادىر تۇنىنە ارنالعان قۇتتىقتاۋ سوزىمەن اشىلسا، مىرزاتاي جولداسبەكوۆ، عاريفوللا ەسىم، باقىتجان ەرتايەۆ ت.ب ەل اعالارى مەرەكەلىك لەبىزىن ءبىلدىردى.

سونىمەن قاتار، رەسپۋبليكالىق «ازىرەت سۇلتان» مەشىتىندە 24 ساۋىردە باستالعان  «رامازانداعى قۇران حاتىم» اتتى ونلاين حاتىم وقۋ شاراسى تۇيىندەلدى. باعدارلاما بارىسىندا كوپكە تانىمال قاري جۇمانازار سادىرحانوۆ قۇران اياتتارىن وقىسا، قمدب ءتوراعاسى، باس ءمۇفتي ناۋرىزباي قاجى تاعان ۇلى قۇران حاتىم دۇعاسىن جاساپ، اللا تاعالادان ەلىمىز بەن جەرىمىزدىڭ اماندىعىن سۇراپ، ىزگى تىلەك تىلەدى.

كەيىن ونلاين باعدارلامادا ءقادىر تۇنىندەگى قۇلشىلىق پەن دۇعا جونىندە بەينەروليك ۇسىنىلسا، «ازىرەت سۇلتان» مەشىتىنىڭ باس يمامى ەربولات ءجۇسىپوۆ «قۇلشىلىق جاساۋداعى ىقىلاس-نيەتتىڭ ورنى»، قمدب ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ «زىكىر، سالاۋات جانە تاسبيح ايتۋدىڭ ارتىقشىلىعى»، قمدب ءدىني ءبىلىم جانە كادر دايارلاۋ ءبولىمىنىڭ مەڭگەرۋشىسى سمايىل سەيتبەكوۆ «يسلام – مەيىرىم ءدىنى» تاقىرىپتارىندا ۋاعىز-ناسيحات ايتتى.

بۇعان قوسا، قمدب شاريعات جانە ءپاتۋا ءبولىمىنىڭ مامانى مەدەت قۇرساقوۆ كورەرمەندەر تاراپىنان قويىلعان ءدىن تاقىرىبىنداعى سۇراقتارعا جاۋاپ بەردى.