پرەزيدەنت جانىنداعى ۇلتتىق قوعامدىق سەنىم كەڭەسىنىڭ مۇشەسى، زاڭگەر ايگۇل ورىنبەك ءوزىنىڭ Facebook پاراقشاسىندا شىمكەنت قالاسىنداعى اۋرۋحانالاردىڭ ءبىرى قاتتى سىرقاتتانىپ كەلگەن اناسىن قابىلداماي جاتقانىن ايتىپ، شاعىمداندى.

جەلىدەگى جازباسىندا پرەزيدەنتتەن شىمكەنت قالاسىنىڭ اكىمى مۇرات ايتەنوۆ پەن دەنساۋلىق ساقتاۋ دەپارتامەنتىنىڭ باسشىسى رۇستەم البايەۆتىڭ ورنىنان كەتۋىن تالاپ ەتىپ، ۆيدەوۇندەۋ جولدادى. 

– تاڭنان بەرى انامدى اۋرۋحاناعا جاتقىزا الماي جاتىرمىن. جەدەل جاردەممەن الىپ كەتىپ، كەيىننەن جەدەل جاردەم انامدى ەسىك الدىنا لاقتىرىپ كەتتى. مەن انامدى اۋرۋحاناعا جاتقىزا الماي جاتىرمىن، باسقالارىن ايتا المايمىن. اكىمدىككە كەلسەم جاۋاپ بەرمەيدى. انامنىڭ ەكى وكپەسى جارامسىز، تەز ارادا انامدى اۋرۋحاناعا جاتقىزۋ قاجەتتىگىن وبلىستىڭ دارىگەرلەرى ايتتى. انامنىڭ تۇرعىلىقتى مەكەن-جايى شىمكەنت قالاسى. شىمكەنتتەن بولسا دا، جاتقىزباي دالاعا شىعارىپ، لاقتىرىپ تاستادى. 60-قا كەلگەن انامدى وسىلاي قورلاپ وتىر، – دەدى ا. ورىنبەك.

ونىڭ ايتۋىنشا قازىرگى ۋاقىتتا اناسىنىڭ دەنساۋلىعى ناشار جانە اۋرۋحانا باسشىلارى ۇيگە قايتارىپ وتىر.

– 5 ملرد-قا سالىنعان جۇقپالى اۋرۋحانا كىم ءۇشىن سالىندى؟! باي-باعلاندار، اكىمدەر ءۇشىن سالىندى ما، يا مينيستر، پرەزيدەنت ءۇشىن سالىندى ما؟! قاراپايىم حالىق نە ىستەيدى؟! ماعان نە ءۇشىن ەكەنىن بىرەۋ شىعىپ، جاۋاپ بەرسىن، – دەپ تالاپ قويدى ايگۇل ورىنبەك. 

"5 ميللياردقا سالىنعان اۋرۋحاناسىندا رەانيماسيوننىي جوق ەكەن!"

انامدى جەدەل جاردەم قايتادان الىپ كەتتى. تەك وسىلاي ينتەرنەتكە شىعىپ "اناڭ ءۇشىن ايقايلاپ جىلاۋىڭ كەرەك ەكەن!" ازاننان بەرى وكپەسىن رەنتگەنگە ءتۇسىرىپ، ءحالىنىڭ ناشار ەكەنىن، دارىگەر ەمەس، مەن ءتۇسىنىپ تۇرمىن! تۇركىستان وبلىستىق اۋرۋحاناسى شۇعىل تۇردە اۋرۋحاناعا جاتقىزۋ كەرەك ەكەنىن ايتقان سوڭ بىردەن سكورىي شاقىردىق. سويتسەك ول جاق اناليز بولماي قابىلدامايدى دەپ بىردەن ايتتى. انامنىڭ وكپەسى 75% جارامسىز دەدى ۆراچ.

جاڭا اۋرۋحانا دا رەانيماسيوننىي جوق، ەسكىگە الدىرامىز دەدى. وسىلاي ساندالىپ جۇرگەنىمىزگە التى ساعاتتان استى! جاڭا اۋرۋحانادا رەانيماسيا جوق بولسا، ونى كورمەگە سالىپ قويدىڭدار ما؟

پرەزيدەنت ق توقايەۆ مىرزا!

ءبىزدىڭ شىمكەنت قالاسىنداعى اۋرۋحانا ءسىز كەلىپ لەنتاسىن قيۋ ءۇشىن سالىنعان ەكەن.

ول جاقتا رەانيماسيا جوق!

بىر-بىرىنە جۇمساپ، بىر-بىرىنە لاقتىرىپ "وبلىسقا قارايمىز"، "قالاعا قارايمىز" دەپ قاراپايىم حالىقتى ءيتتىن شىعارادى!

وسىلاي جۇرگەندە ادام ءولىپ كەتسە شە؟" دەپ جازدى زاڭگەر.