دەنساۋلىق ساقتاۋ ءمينيسترىنىڭ مىندەتىن اتقارۋشى ءلاززات اقتايەۆا حالىقتى سەبەپسىز پتر-تەستتەن وتپەۋگە شاقىردى. بۇل تۋرالى ول ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ايتتى. 

"جۇرگىزىلىپ جاتقان تەستتەردىڭ سانى بويىنشا مالىمەتتى كەلتىرسەك: 100 مىڭ ادامعا ەسەپتەگەندە قازاقستان تاۋلىگىنە 7 مىڭ ادامدى تەستتەن وتكىزەدى. باسقا ەلدەرمەن سالىستىرىپ كورەلىك: 100 مىڭ ادامعا ەسەپتەگەندە اۆستريا مەن كانادادا كۇنىنە 6 مىڭ ادام، اقش-تا 8 مىڭ ادامدى وتكىزەدى. بۇل تىزىمدە قازاقستان 34ء-شى ورىندا تۇر" دەدى اقتايەۆا.

ول ازاماتتارعا تەست تەك كلينيكالىق جانە ەپيدەميولوگيالىق كورسەتكىش بويىنشا جۇرگىزىلۋى كەرەكتىگىن ەسكە سالدى.

"تەستىلەۋدەن مەديسينالىق ۇيىمدارداعى ينفەكسيالىق جانە پروۆيزورلىق ستاسيونارلارعا جاتقىزىلعان، جرۆي، پنيەۆمونيا بەلگىلەرى بار نەمەسە كۆي جۇقتىرعان، مەديسينالىق باقىلاۋداعى ازاماتتار وتەدى. ەپيدەميولوگيالىق كورسەتكىشتەر بويىنشا ناۋقاستارمەن جاقىن قارىم-قاتىناستا بولعان ازاماتتار، ستاسيونارعا جوسپارلى نەمەسە شۇعىل تۇسكەن پاسيەنتتەر، مەديسينالىق-الەۋمەتتىك مەكەمەلەرگە تۇسكەن ازاماتتار تەستتەن وتەدى. سونىمەن قاتار تەست الدىن الۋ شاراسى ءۇشىن دە وتكىزىلەدى. ول سانات بويىنشا وتەتىندەر: قازاقستانعا شەتەلدەن كەلەتىن ازاماتتار، جۇقتىرۋ ءقاۋپى جوعارى مەديسينا قىزمەتكەرلەرى (ايىنا ءبىر رەت) مەن اسكەرگە شاقىرىلۋشىلار" دەدى ول.

بۇعان بولەك، دەنساۋلىق ساقتاۋ ءمينيسترىنىڭ مىندەتىن اتقارۋشى مەديسينالىق كورسەتكىش بويىنشا تەستتەن ءوتۋدىڭ ماڭىزدىلىعىنا توقتالدى.

"تەست كورسەتكىشى جوق ازاماتتارعا تەستتەن ءوتۋدىڭ قاجەتى جوق. ياعني نە كلينيكالىق، نە ەپيدەميولوگيالىق كورسەتكىشى جوق ازاماتتارعا تەستتەن ءوتىپ قاجەت ەمەس. حالىقتان تەك مەديسينالىق كورسەتكىش بويىنشا تەستتەن ءوتۋدى وتىنەمىز. ادامداردىڭ تەستتەن ءوتۋى كەرەكتىگىن كلينيكالىق نەمەسە ەپيدەميولوگيالىق كورسەتكىش راستالعان جاعدايدا دارىگەر نەمەسە ەپيدەميولوگ شەشەدى. مەن بۇرىن كوروناۆيرۋس ينفەكسياسى انىقتالعان ناۋقاستاردىڭ ىشىندە 24 پايىزىنىڭ كلينيكالىق كورسەتكىشى بارىن اتاپ وتكەن ەدىم. سول سەبەپتى كلينيكالىق كورسەتكىشى بار ادامدارعا باسىمدىق بەرىلۋى ءتيىس. سەبەبى كوروناۆيرۋستى ۋاقتىلى انىقتاۋ – ويلى ەم-دومنىڭ كەپىلى. ياعني ەگەر مەديسينالىق كورسەتكىشسىز قارالاتىن بولساڭىز، بۇل جاعداي زەرتحانالارعا جۇكتەمەنى ۇدەتىپ، تيىسىنشە تەست ناتيجەسىن الۋ ۋاقىتى دا سوزىلىپ كەتەدى" دەدى اقتايەۆا.