نۇر-سۇلتان قالاسىندا ەر ادام ءوزىنىڭ بۇرىنعى ايەلىن سەگىز جەردەن پىشاقتاعان. بۇل تۋرالى "نەمولچي" قورىنىڭ وكىلدەرى الەۋمەتتىك جەلىدە جازدى. اۋرۋحانادا تۇسىرىلگەن ۇرەيلى سۋرەتتەر جەلىدە تاراپ جاتىر.
قوردىڭ نەگىزىن قالاۋشى دينا سمايلوۆانىڭ ايتۋىنشا ەر ادام ايەلىنىڭ جۇمىسىنا كەلىپ، سىرتقا شىعۋىن تالاپ ەتكەن.
"ارىپتەستەرىنىڭ الدىندا ءوزىن ىڭعايسىز سەزىنگەن ايەل سىرتقا شىققان. سول ساتتە بۇرىنعى كۇيەۋى ونى كولىگىنە يتەرىپ وتىرعىزىپ، الىپ كەتكەن. جولدا، دالىرەك ايتقاندا قاراعاندى تاس جولىندا ول ايەلگە پىشاق تىعا باستاعان، قارسىلىق كورسەتكەن ول كولىكتىڭ تەرەزەسىن سىندىرماق بولدى. سەگىز رەت پىشاقپەن جاراقاتتاعان سوڭ كولىكتى توقتاتقان. باسقا كولىكتەردىڭ جاندارىنا كەلىپ جاتقانىن كورىپ ەركەك ايەلدى جولدىڭ بويىنا تاستاپ ءوزى جاسىرىنىپ قالعان. جولاۋشىلار وقيعا ورنىنا جەدەل-جاردەم جانە پولسيا قىزمەتكەرلەرىن شاقىرعان"،- دەپ جازدى دينا سمايلوۆا ءوز Facebook پاراقشاسىندا.
ايەلدىڭ اۋرۋحانادا تۇسىرىلگەن سۋرەتتەرىن دينا سمايلوۆا ءوز پاراقشاسىنا جۇكتەگەن.
