وسى اپتادا اقش دەنساۋلىق ساقتاۋ ءمينيسترى تايۆانعا بارعاننان كەيىن بەيجىڭ ۆاشينگتونعا قاتاڭ ەسكەرتۋ جاسادى.
اقش دەنساۋلىق ساقتاۋ ءمينيسترى الەكس ازار تايۆان پرەزيدەنتى ساي ينگ-ۆەنمەن كەزدەسىپ، ەكى ەل اراسىنداعى تىعىز قارىم-قاتىناستى تالقىلاعان. ەكى تاراپ تايۆاننىڭ پاندەميا ساياساتى تۋرالى تالقىلاپ، اقش ءمينيسترى تايۆاننىڭ كوروناۆيرۋس ساياساتىن "الەمدەگى ەڭ ءساتتى" دەپ سيپاتتاعان.
تايۆان سوڭعى كەزدەردە جۇڭگو مەن اقش اراسىنداعى شيەلەنىس ايماعىنا اينالدى.
دۇيسەنبىدە تايۆان اۋە كۇشتەرى بۇعازداعى ورتا سىزىقتى كەسىپ وتكەن قىتايلىق جويعىش ۇشاقتارعا ەسكەرتۋ جاساعانىن مالىمدەدى. قىتايلىق ۇشاقتاردى زەنيتتى زىمىراندارمەن باقىلاعانىن حابارلاعان.
اقش ءمينيسترىنىڭ تايۆانعا ساپارى تۋرالى جۇڭگو ءسىم وكىلى چجاو ليسيان "ءبىز امەريكاعا تاعى ءبىر رەت ەسكەرتەمىز، جۇڭگو اقش پەن تايۆاننىڭ كەز كەلگەن سىلتاۋمەن رەسمي قارىم-قاتىناس جاساۋىنا قارسى تۇرادى... قىتايدىڭ نەگىزگى مۇددەلەرىنە قاتىستى ماسەلەلەر تۋرالى امەريكا قۇراما شتاتتارىنداعى كەيبىر ادامداردا ەلەستەر مەن تىلەكتەر بولماۋى كەرەك. وتپەن ويناعاندار كۇيىپ كەتەدى" دەپ مالىمدەگەن.
پىكىر قالدىرۋ